Os Nosos Venres Musicais (XXIII)

Velaquí un clásico.

More Videos

De morte natural

“Como palmar en el monte” é un dos títulos da colección de manuais de excursionismo e sendeirismo da editorial Desnivel. Quizá pensedes que non vos interesa o tema, pero aconsellámosvos que lles botedes unha ollada. Sempre pode xurdir a necesidade.

O libro que reseñamos trata das cen maneiras máis atractivas de morrer ao aire libre. Desde aquí, queremos contribuír a esta bonita iniciativa cos vídeos de dous lugares, tamén moi bonitos, e nos que é facilísimo morrer de morte natural.

Empezamos indo a un típico lugar turístico de Noruega, unha rapaza contemplando a paisaxe, a música de Tchaikovsky, todo moi relaxante....

Agora achegámonos a Málaga. Imos ao Camino del Rey. Agarrádevos á mesa se tedes vértigo!!!

E que decides dos obreiros que o fixeron a principios do século XX?

Inauguración da Biblioteca do CEIP de Pazos

Hoxe inaugurouse a Biblioteca do CEIP de Pazos e O Segrel do Penedo estivo alí.

Foi un acto ben fermoso no que Chispa tivo o seu momento máxico, cando ante autoridades, rapaces, profes, pais, nais, e amigos, e a través dunha carta que leu Rosana, agradeceu a cantos fixeron posible a chegada deste gran dia.

Outro dos momentos máis fermosos foi cando dous alumnos de 6º de primaria, contaron o que para eles era a Biblioteca. Alberto falou da biblioteca como un lugar para ler e relaxarse e Nerea dixo que era un dos seus sitios preferidos porque alí estaba rodeada de Maxia, os Libros!!

E chegou o momento de Antón Cortizas que nos contou para que servía un libro, e a pesar da insistencia dos máis pequenos que non paraban de dicir que para ler, el, empeñábase en dicir que servía para sentarse, para agocharse da choiva, para defendérmonos…, pero sobre todo PARA SOÑAR por iso as bibliotecas deberían chamarse “SOÑOTECAS”. Fermoso, non si?

Parabéns a Rosana e a toda a comunidade educativa do CEIP de Pazos por esta fermosísima biblioteca, un espazo máxico cheo de ilusións e proxectos que desexamos poder seguir compartindo

Para “O Segrel” foi un verdadeiro pracer celebrar con todos vós este gran día.

Boa travesía e mellores lecturas!!

Os Nosos Venres Musicais (XXII)

Esta semana queremos ofrecer a nosa pequena homenaxe a todas esas mulleres e homes (aínda que nunha porcentaxe moito menor), que se enfrontan con forza, con moitísima forza, ao cancro da mama ou de calquera outro tipo.

Para tod@s vós, para tí Rosa, miña benquerida amiga, e para todos os que están ao voso carón dándovos apoio, forza, cariño, moitísimo cariño ... este marabilloso vídeo de Luz Casal.

"Se Feliz" é unha fermosísima cancion chea de optimismo que compuxo durante a súa loita contra un cancro de mama

A batalla pode ser moi dura, o inimigo terrible, pero non invincible!!!

24 de Outubro: Día da Biblioteca

Hoxe, 24 de outubro conmemórase o Día da Biblioteca. Este ano, a celebración terá lugar en Santiago de Compostela. Durante este acto presentarase o cartel conmemorativo, obra de Xosé Cobas Gómez e lerá o pregón o recén galardoado Agustín Fernández Paz.

Fragmento do pregón:

ONDE HAI UNHA BIBLIOTECA HAI UNHA LUZ

(...) os libros posúen a insólita capacidade de revivir e reinventarse en cada nova lectura.

Todas as persoas necesitamos as historias, os soños, as palabras (...)

Sabemos que non poderíamos vivir sen o alento da imaxinación e a creatividade, sen as palabras que expresan a variedade e a beleza dos nosos desexos e os noso sentimentos.

Por todo iso, abramos os libros. Eles conteñen os soños, as paixóns, os medos, os amores, as risas. Nas súas páxinas habita a inmensa variedade de sentimentos e experiencias da humanidade, das persoas que viven agora en calquera lugar do mundo e das que desapareceron hai moitos anos. Os libros: ríos de palabras que se nos ofrecen con xenerosidade para axudarnos a parender o oficio de vivir, para cambiarnos a vida e implicármonos na transformación do mundo.

FELIZ DÍA DA BIBLIOTECA!!

Agustín Fernández Paz: Premio Nacional de Literatura Infantil e Xuvenil

Hoxe, a través da Asesoría de Bibliotecas Escolares, coñecimos a marabillosa noticia da concesión do Premio Nacional de Literatura Infantil e Xuvenil 2008 a Agustín Fernández Paz pola súa novela "O único que queda é o amor"

O curso pasado disfrutamos da súa presenza no noso instituto, nun "Encontro" que en palabras dos alí presentes, alumnado e profesorado, será imposible de esquecer.

Agustín transmitiunos o seu amor polos libros, pola lectura, pola escritura...

E ao remate desa visita, asinounos moitos exemplares das súas obras, entre elas, como non, a nosa favorita "O único que queda é o amor".

Durante esa visita tamén estivo presente Radio Barullo. E que mellor ocasión que esta para probar unha nova ferramenta que nos achegou, como é habitual, o Capitán K.


(Vía ANB) Grazas Capitán!!

Obras de Agustín Fernández Paz nos fondos da nosa biblioteca.

Dende "O Segrel do Penedo", e en nome de todos os membros da nosa comunidade educativa, queremos amosar a nosa inmensa ledicia pola concesión deste merecidísimo premio ao noso querido e admirado Agustín Fernández Paz.

PARABENS!!!

OHIULARI CLAWN EN RADIO BARULLO !!

Hoxe Radio Barullo, a nosa Radio Escolar, recolle unha pequena mostra das "conclusións" dos II Encontros de Bibliotecas Escolares de Galicia.

Unhas "conclusións" que fixeron que a práctica totalidade dos asistentes non nos movéramos dos nosos asientos ata que esta "fantástica mestra" abandonou o escenario.

Perdoade a mala calidade dos videos, pero aínda así, merece a pena que os disfrutedes.

II Encontros Bibliotecas Escolares de Galicia

O pasado fin de semana celebráronse en Santiago os II Encontros de Bibliotecas Escolares de Galicia baixo o lema "Bibliotecas para ler e aprender"

Un fantástico programa para dous días intensos nos que se falou de lectura, de ALFIN, de proxectos documentais, da integración das TICs, do traballo coas familias, de materiais, ... en definitiva de Bibliotecas Escolares.

Sentímonos orgullosísimos do magnífico traballo que se está a realizar nas Bibes Galegas.

Dixéronse cousas moi interesantes, moi emocionantes e como non, cousas moi divertidas.

"A conquista de espazos para a Biblioteca Escolar é unha labor de Pioneiros"
"A selección de materiais en todos os soportes, tórnase unha actuación necesaria, delicada e inevitable"
"A Biblioteca Escolar coordinará, xestionará... asumirá a provisión dos documentos necesarios para garantizar o itinerario de lectura planificado polo centro educativo"

"Preocúpame a soidade das Bibliotecas Escolares"

"A primeira Biblioteca que coñecín na miña vida foi a miña nai e a súa capacidade máxica de crear historias"
"O vicio da lectura é incurable. Só nos pode curar o seu exercizo, como vivir e amar"
"Libro e Lectura deben escribirse con L de Liberdade"
"Ler é desexar que un libro non remate nunca"

"Queríamos ter a mellor biblioteca do mundo en Vide"
"A Biblioteca como lugar recoñecido, recoñecible e usado"

E que me decides de "Magister vs. Minister"? (Sen comentarios!!)

Aquí vos deixamos unha pequena reportaxe gráfica, de parte do que alí aconteceu.

Reportaxe Gráfica dos GBI

Parabén Pilar e Cristina polo voso sempre magnífico traballo!!

Os Nosos Venres Musicais (XXI)

Hai que ver como cambiou este país. Hai corenta anos tiñamos cancións que falaban de emigrantes. Velaquí ao maestro Antonio Molina....

Na actualidade cántaselles aos inmigrantes: Lamary de Chambao....

Cancións de época, a que si?

Unha nova cantiga medieval

Leocadia García, sobriña neta de Tristán García (o de Isolda, claro), é unha xove filóloga que convocou esta semana unha rolda de prensa en Santiago para informar do achado dunha cantiga medieval que pode confirmar a existencia do Rei Cintolo.
Esta cantiga, da autoría dun tal Clodio do Rego Cavado e datada no século XII, estaba escondida nun pergamiño conservado no Arquivo Secreto do Vaticano. Relata os amores dunha dama que fará por ver, na feira de As San Lucas, ao seu cabaleiro que vivía en Argomoso, a poucos quilómetros de Mondoñedo e onde se encontra a Cova do Rei Cintolo. Esta cavidade natural sempre foi obxecto de lendas, pero esta é a primeira proba de que nese lugar existiu unha corte real.

A continuación ofrecémosvos as estrofas recuperadas:

A Mondoñedo m´irei á feira,
a encontralo daquela maneira.
Ai madre,d´ alí d´Argomoso
ha vir meu amigo ben fermoso.

Á San Lucas mahá irei,
e ao meu senhor por ver farei.
Ai madre,d´ alí d’ Argomoso
ha vir meu amigo ben fermoso.

Por moito que me faz rogar,
so penso en con el me casar.
Ai madre,d´ alí d´ Argomoso
ha vir meu amigo ben fermoso.


Recordade que esta fin de semana son As San Lucas en Mondoñedo, a feira máis antiga do reino.

O pai do alcalde

Un fermoso post no blog de Iván Puentes lévame a pensar na poesía ou no trascendente que se esconde nas pequenas cousas do día a día. O ser humano é capaz de atopar beleza en detalles insignificantes ou en circunstancias tráxicas. Por uns momentos somos conscientes de que o máis importante nesta vida é querernos.

Empezamos a semana dedicándolle a Iván as secuencias de dúas pelis nas que o protagonista é un pai e nas que a mensaxe de fondo ten moito que ver co que lle pasou.

Os Nosos Venres Musicais (XX)

Vas a pasar toda a fin de semana diante do ordenador?

Espabila, sal da casa e baila!!!!!!!!!!!!!

Unha ilustre recomendación

O que son as cousas. Recibimos, no mesmo día, cadanseu correo dos ilustres científicos o profesor Tornasol e o profesor Bacterio. (É incríbel que estes dous aínda non se mataran cos seus experimentos.)

Ambos se confesan visitantes habituais dos blogs da bibliotecas escolares e queren aproveitar que estes días están concedéndose os premios Nobel para recomendarnos un blog de ciencia e tecnoloxía: http://www.microsiervos.com/

Moitas grazas, profesores.

Roteiro polas Bibliotecas Escolares (VII): Escola Unitaria de Vide

Hoxe comezamos os nosos Roteiros polas Bibliotecas Escolares Galegas na Escola Unitaria de Vide. E aínda que Toño, un dos membros fundamentais do GBI, non puido vir (disque está nas Canarias por motivos laborais!!) a compañía non puido ser mellor. Nesta ocasión pasamos de tres a cinco e connosco estiveron Beni, Carmela e Gina.

Sobre a unha e media do mediodía, nun marabilloso día de sol, chegamos a "As Neves" (O Sol do Condado) onde nos recibiron Sabela e Lourdes.

Mentras facíamos tempo para comer e despois de admirar unhas magníficas vistas, Sabela dounos unha lección maxistral sobre a arte da pesca da lamprea, de como se seca, das distintas maneiras de preparala, disque se pode guisar, rebozar, ponse tamén á prancha e por suposto rechea. Máis chegado ese momento decidimos ir xantar. Que fame tiñamos!!!

E chegou a ansiada lamprea acompañada dun magnífico Alvariño. Preparáronna rechea, estaba exquisita. Gustounos tanto que xa estamos desexando que chegue a temporada para ir probar a lamprea verde, pero esa será outra historia...

Ás cinco, rematada a comida e logo dos cafés e dunha conversa moi agradable, xa se sabe bibliotecas escolares, clubs de lectura, encontros..., saímos para a ESCOLA, porque eso é o que é, unha ESCOLA con maiúsculas. Unha escola unitaria como as que xa non quedan. Unha escola onde o "currículo" tamén o marca unha rá que aparece unha mañá polo patio, a viña que está ao carón da escola ou calquera outra circunstancia que motive aos pequenos. Unha escola cunha biblioteca, a Biblioteca "A Dúas", que é o motor arredor do que xira non só a vida da escola, senón tamén a vida cultural do pobo. "A Dúas" é o punto de encontro onde os veciños se xuntan cada xoves para ver unha película ou para calquera outra actividade que a MESTRA, unha muller moi especial, organice.

Un dos "libros" máis importantes do fondo de "A Dúas"

VVAA: Érase unha vez... A Dúas, Editorial Unitariadevide, As Neves (2007)

E despois desta visita, que tanto desexábamos facer, non chegou a despedida. Non, as nais de Vide "Compoñentes do Equipo da Biblioteca", tíñannos preparada unha sorpresa moi especial. Na Casa da Auga agasalláronnos cunha magnífica actuación dunhas fantásticas pandeireteiras, e un pandeireteiro, que fixeron que a nosa visita a Vide sexa inesquecible.

Grazas a todas por facernos sentir como se fóramos uns máis do grupo.

Ata a próxima, que esto hai que repetilo!!!

Tamén nos outros GBI Blogues:
A Nosa Biblioteca
Biblioafonso

Outra crónica en:
Cadernos de Vide

Os Roteiros do 07/08
CEIP Milladoiro-Malpica
CEIP José Cornide (A Coruña)
IES Uxío Novoneyra (A Coruña)
IES de Arzúa
IES Alexandre Bóveda (Vigo)
IES Río Cabe (Monforte)

Os Nosos Venres Musicais (XIX)

Hoxe retomamos "Os Nosos Venres Musicais" e que mellor xeito de comezar que facelo co videoclip do tema "Acabo de llegar" de "Fito y Fitipaldis".

Un bo exemplo de "fomento da lectura" utilizando como telón de fondo a música, nun decorado "minimalista" con certas pinceladas que nos lembran a Mondrian

Non vos parece unha boa elección?

Que o disfrutedes!!!!!

Máis videos do grupo

Unha Merecida Homenaxe a Tod@s Vós!!!

Hoxe, 1 de outubro, comeza o Mes Internacional da Biblioteca Escolar, e dende O Segrel do Penedo queremos rendir a nosa particular homenaxe a todos os docentes que están a traballar ao fronte das Bibliotecas Escolares Galegas.

Un profesorado que a pesar dos atrancos cos que se atopan no seu traballo cotiá (a falta de apoio dalgunhas direccións, a falta de comprensión dalgúns claustros, a falta de recoñecemento da Administración…) están a converter as nosas bibliotecas escolares en verdadeiros centros de formación e información.

Un magnífico grupo de profesionais que están a desenvolver un traballo no que creen e ao que lle dedican tempo, moito tempo, e moitísimas enerxías cun obxectivo fundamental facer das nosas bibliotecas escolares puntos de encontro.

Parabéns a todos os que estades a facer realidade o que hai uns anos non era máis que un sono duns poucos e que ese merecido recoñecemento a un labor ben feito sexa axiña realidade.

Cada día máis e mellores Bibliotecas Escolares grazas a todos e todas vós!!

Non están todas as que son, disculpade,
pero son todas as que están.

(Completaremos o álbum nos próximos Roteiros dos GBI)

Outubro: Mes Internacional da Biblioteca Escolar

“Alfabetización e Aprendizaxe na Biblioteca Escolar” Este é o lema elixido para conmemorar este ano o “Mes Internacional da Biblioteca Escolar” nunha clara referencia ao papel fundamental das Bibliotecas Escolares no ensino.

A Asociación Internacional de Biblioteconomía Escolar (IASL), previa recomendiación do seu comité executivo, aprobou en decembro de 2007 o cambio do Día Internacional da Biblioteca Escolar polo Mes Internacional da BE.

Según declararacións de Rick Mullhollan, coordinador de IASL “Este cambio coincide co décimo aniversario da súa celebración por parte da IASL, e permitirá aos responsables das bibliotecas escolares de todo o mundo elixir o día de outubro que mellor se adapte ás súas necesidades co fin de resaltar a importancia das bibliotecas escolares”

O presidente da IASL, Henri James, declarou asi mesmo que “O Día Internacional da Biblioteca Escolar chegou a ser tan importante que creceu ata convertirse no Mes Internacional da Biblioteca Escolar (ISLM). Esto significa que os responsables das bibliotecas poderán elixir o día, a semana ou incluso ata todo o mes, para fomentar a súa biblioteca escolar, co que iso supón para a comunidade escolar”

Para saber máis:
IASL

O Segrel do Penedo

Celebramos "O Día da Biblioteca Escolar"

Logo da Alfabetización Informacional

O 10 de Agosto pasado foi presentado o logo que simbolizará internacionalmente a Alfabetización Informacional.

A intención pola que se crea este logo é a de facilitar a comunicación entre aqueles que levan a cabo proxectos de alfabetización informacional, as súas comunidades e a sociedade en xeral.

O gañador do concurso organizado pola UNESCO e a IFLA, Edgar Pérez Luy, un xoven deseñador cubano, explicaba o seu significado, “O logotipo comunica, dun xeito moi sinxelo, a capacidade humana de buscar e acceder á información, non só a través dos medios tradicionais, senón tamén mediante o uso das TIC, xa que utiliza recursos gráficos coñecidos en todo o mundo, como o libro e o círculo. O primeiro deles simboliza o estudo, e o segundo o coñecemento e a información, que hoxe están máis disponibles a través da informática, demostrando así que o seu obxectivo social é comunicar. O libro, aberto e cerca do círculo, representa unha metáfora visual que simboliza ás persoas que teñen as ferramentas cognitivas para chegar á información dun xeito áxil, así como o desexo de compartir esta capacidade”

Para saber máis:
Information literacy International Logo

Baixar o Logo

As Meninas nas Rúas de Canido en Ferrol

Onte á mañá visitei o Barrio de Canido.

Un amigo fíxome un encargo. As súas palabras foron “necesito fotos das Meninas de Canido para Inici-arte”, sen saber que eu xa tiña en mente esa reportaxe gráfica. Quería que o meu primeiro artigo no noso blog se fixera eco dunha maravillosa iniciativa que xorde de dous veciños de Canido, un dos barrios máis antigos da cidade de Ferrol, Eduardo Hermida e Gustavo Sequeiro, dous artistas decididos a revitalizar o seu barrio.

“...pintar una serie de originales meninas en las fachadas de las casas abandonadas para dar una nota de color y revitalizar de una manera artistica el deterioro de estas casas”. Eduardo Hermida

E nesta iniciativa deciden participar non só os veciños do barrio senón artistas do renome de Jorge Cabezas (a súa primeira obra foi vítima da intolerancia e da falta de respecto aos demáis), Collado, Carmela González, Avelino Castro, a diseñadora Marta Ramos, Patinha, Jorge Llorca, Siro, Suso Basterrechea, Raimundo Anido e Luis Rapela entre outros.

E durante a miña visita, como é a vida..., coñecín ao pai de Eduardo Hermida. Un home orgullosísimo do seu fillo, da súa obra e desa idea que puxo en pé aos veciños e que sacou o barrio ao exterior. Un home amabilísimo que me contou anécdotas e me amosou detalles dalgunhas das obras. Un guía marabilloso para unha visita marabillosa.

Grazas Sr. Hermida, sen vostede a miña visión sería, cando menos, diferente. Todo un pracer coñecelo e poder apreciar a arte das Meninas de Canido dun xeito moi, moi especial.

Máis en:

Iniciarte

El País

El Correo Gallego

La Voz de Galicia

e-norte.org

Son Cositas

Radiofusión

*Álbum fotográfico actualizado o 30/09/08. Continuará...

E o blog volveu das vacacións

Custounos un pouco poñernos ao día, pero aquí estamos xogando de novo coas TICs e co que unha biblioteca pode ensinar.

Empezamos cun documento audiovisual excepcional, unha metáfora mediática!!! Contamos coa colaboración dun actor e bailarín fabuloso, coa música duns compositores xeniais e cunha peli que fixo escola.

Para todos os nenos e as nenas; para todos vos, os maiores: O Segrel do Penedo personificado en Tony Manero!!!

Excursión a Asturias

O pasado venres 20 de xuño, despois do marabilloso festival de música no que todos cantamos, bailamos e o pasamos súper grazas á gran dose de paciencia e á grandiosa organización por parte da nosa compañeira Bárbara, un grupo de alumnos e alumnas de terceiro e cuarto de ESO, unha profe e a nai dunha das alumnas partimos de viaxe de fin de curso hacia Asturias.

O traxecto en autobús foi un pouco pesado debido á calor que facía, pero a eso das oito da noite chegamos ao hotel nas aforas de Oviedo. Unha vez nos deron as habitacións, nos refrescamos e repuxemos as forzas cunha boa cea, decidimos ir dar unha voltiña polo centro da cidade, por iso de ir afacéndonos a ela. A primeira impresión foi boa, gustounos bastante o ambiente. A verdade é que Oviedo é unha cidade espectacular.

Ao día seguinte pola mañá saímos ben cedo para Ribadesella onde visitamos a cova de Tito Bustillo, verdadeiro recuncho da arte rupestre que se conserva en moi bo estado. Alí un guía transportounos á época dos nosos antergos hai miles de anos, centenares de estalagtitas e estalagmitas, pinturas con escenas de animais, sinais da súa vida cotiá,...

Rematada a visita á cova xa tocaba comer e fixémolo en Covadonga, que está a celebrar o seu ano xubilar. Pero ademais de comer tamén tivemos tempo para visitar a gruta, a cascada, a basílica que se alza en pleno corazón dos Picos de Europa, e os seus arredores. Xa pola tarde saímos hacia un dos lugares que máis gañas tiñamos de visitar e con máis espectación agardabamos: os Lagos de Covadonga. Temiamos que poidera haber néboa, estabamos nervosos. A estrada sinuosa, as vacas e cabras ollándonos pasar, os bicos dos montes cada vez mais preto, algúns cumes aínda nevados. Por fin vimos o primeiro. Sencillamente marabilloso. Seguimos un pouco máis ata o segundo lago, baixamos do autobús, camiñamos ata a orilla e alí descasamos e admiramos esas estupendas paisaxes.

Os dous días seguintes leváronnos a coñecer máis polo miúdo tanto Oviedo como Xixón. En Oviedo nos levamos unha moi boa impresión da cidade xa que o guía mostrounos unha imaxe distinta á que tiñamos. Unha cidade limpa, de feito a máis limpa de España, unha zona antiga totalmente rehabilitada, a catedral, esculturas espalladas por todos os recantos, imaxes que nos recordaban A Rexenta, curiosidades e anécdotas da novela e do seu autor, o teatro Campoamor,... En Oviedo tamén visitamos Santa María do Naranco e San Miguel de Lillo, xoias do prerrománico asturiano. Ademais estivemos vendo a carreira de fórmula I no auditorio onde nos mesturamos cos grupos de asturianos que incondicionalmente apoian ao seu paisano, anque ultimamente non estea dando moitas alegrías.

Xa o luns día 23 estivemos pasando o día en Xixón coa idea de coñecer a parte máis antiga da cidade, a península de Cimadevilla, e tomar un pouco o sol na fantástica praia de San Lorenzo. Isto último non foi posible porque comezou a chover polo mediodía, pero suplimos o plan inmediatamente por unhas compras nun centro comercial. Na península de Cimadevilla poidemos disfrutar das antigas casas de pescadores rehabilitadas que dan un aire romántico á cidade, a casa e praza de Jovellanos, o monumento chamado "Elogio del Horizonte" de Chillida, no cerro de Santa Catalina, e as magníficas vistas da cidade e o porto que se aprecian desde este lugar.

Algo cansos da visita e as compras voltamos ao hotel para descansar un pouco antes de afrontar unha das noites máis máxicas do ano, a noite de San Xoan, e nada mellor para celebralo que achegarnos ata unha das fogueiras máis importantes de Oviedo, a da praza da catedral. Un escenario magnífico, actuacións de grupos rexionais, cantos asturianos, o lume purificador, rapaces rodeando e saltando a fogueira...

Xa o martes voltamos á casa parando en Cudillero e en Luarca, dúas curiosas vilas mariñeiras.

A experiencia podemos resumila como fantástica, os rapaces estupendos, bos compañeiros, responsables, respectuosos, con moitas gañas de pasalo ben pero sin molestar a ninguén, un exemplo para calquera. Seguide así disfrutando de cada momento sanamente, tédelo todo para ser felices. PODEMOS!!!

Bibliotecas Escolares e Web Social: Unha Colaboración Imprescindible

O Segrel do Penedo tamén estará no III Encontro Edublog. E o fará en compañía das bibliotecas escolares que dun xeito moi diverso utilizan as distintas ferramentas que a chamada Web Social pon ao noso alcance, que non son poucas.

Esta é a presentación coa que explicaremos como entramos a formar parte deste mundo apaixoante, ou desta tolemia colectiva para algúns, que revolucionou as bibliotecas escolares galegas.