martes, 22 de decembro de 2015

Felices Festas!!


xoves, 17 de decembro de 2015

Visita á Casa da Cultura

Museo do Humor e BPMHoxe, como ven sendo habitual cada primeiro trimestre, e dentro das actividades organizadas dende a nosa Biblioteca Escolar, o grupo de 1º ESO visitou a Casa da Cultura de Fene.

Recibíronnos Almudena, coordinadora do Museo do Humor, e Silvia a bibliotecaria municipal.

Comezamos coa visita á Biblioteca Municipal, onde Silvia nos falou da súa organización e das actividades que nela se desenvolven. A continuación agasallounos cun pequeno obradoiro de debuxo que nos permitiu descubrir algúns artistas entre a nosa rapazada.

Trala visita á biblioteca, Almudena fíxonos un fantástico percorrido pola Exposición "Francisco Ibáñez, el Mago del Humor" achegándonos á figura de Ibáñez o as súas personaxes. Visita que complementamos cunha proxección de debuxos de Mortadelo e Filemón.

Velaí tedes unha pequena mostra de como transcurriu esta mañá chea de humor...

* Clicar na imaxe para ir ao álbum



venres, 27 de novembro de 2015

Neira Vilas In Memoriam

"Galicia é a nai e é a patria. O meu principio e o meu fin. A miña razón de vivir. A nosa lingua é o meu orgullo"

"Temos o deber moral e o deber patriótico de enriquecer o noso patrimonio histórico e cultural. O que herdamos dos nosos antepasados e o que sexamos capaces de crear co aporte de todos. Galicia espera iso de nós. O pobo que non ten unha cultura de seu acaba sendo parásito de culturas alleas"

"Temos o dereito e o deber de ser rebeldes"

Un pregoeiro de honra
A noticia na prensa
Sermos Galiza
Praza Pública
La Voz de Galicia
La Opinión
Faro de Vigo
El Correo Gallego
El Progreso
20 Minutos
El diario.es
La Verdad
El Pais
El Mundo
ABC
Europa Press


mércores, 25 de novembro de 2015

venres, 6 de novembro de 2015

Novembro, Mes da Ciencia

Celebrando o mes da Ciencia nas Bibliotecas Escolares cunha pequena exposición de parte dos fondos da nosa biblioteca. 

Un xeito de amosar aos membros da nosa comunidade eses fondos de narrativa, cine, álbum ilustrado, cómic e, por suposto, parte do fondo informativo que non queremos que se quede esquecido nos andeis...

O científico Jorge Mira é o autor do Manifesto con motivo desta celebración.


mércores, 28 de outubro de 2015

Samaín no Segrel

Samaín
Xa estamos de volta e pensamos que non hai mellor xeito que celebrando o Samaín.

O Segrel "vestiuse" para a ocasión. Sairon dos andeis algúns dos nosos fondos de lendas, historias de medo, terror... e como non, fantásticas cabazas recén chegadas dende Lugo, que o noso compañeiro Xoán se encargou de decorar e, dende o laboratorio de ciencias, chegaron un esqueleto e algunha caveira terrorífica... Vamos, que non nos falta nada como poderán comprobar os nosos visitantes.

Feliz Samaín!!!


martes, 19 de maio de 2015

Roteiro Pérez Parallé (O Segrel do Penedo)

Dende hai xa varios cursos, un dos nosos obxectivos é achegar a figura de Xosémaría Pérez Parallé (O Segrel do Penedo) ao alumnado que se incorpora ao noso centro en 1ºESO. Para tal fin,  en colaboración co departamento de galego, organízase un roteiro pola zona nos primeiros meses do curso, pero nesta ocasión, o inverno mantívonos pechados no centro ata o 19 de maio, no que amenceu un fermosísimo día primaveral que nos levou a percorrer os lugares nos que O Segrel pasou a meirande parte da súa vida.



A primeira parada foi na Casa da Sociedade, "Casa de oficios varios e peóns de Barallobre", a segunda, no Casal de Sandulfe, lugar onde se atopa a casa da familia Pérez Porto. No xardín da casa, diante das esculturas homenaxe aos clásicos: Rosalía, Curros e Pondal, léronse poemas como "Microbiografía" de Parallé, "Cartafol da saudade", "Cantigas dun serán avesío" e "Non falarei, non", entre outros. Logo visitamos o pequeno museo etnográfico onde se conserva a campá da igrexa do Bon Xesús do Pazo de Barallobre, one hoxe está o noso instituto. Rematamos o percorrido na antiga "Casa de curtidos" propiedade da familia da muller de Parallé.

Antes de rematar, Sabela e Lorena, alumnas de 1ºESO, fixéronlle unha entrevista a Francisco Pérez Porto, recoñecido ceramista e fillo do Segrel, a quen lle queremos agradecer o seu labor de cicerón neste marabilloso roteiro que nos levou aos lugares onde O Segrel pasou a meirande parte da súa vida.

Álbum de fotos

sábado, 25 de abril de 2015

Día do Libro

O pasado xoves, 23 de Abril, celebramos o Día do Libro. Foi unha xornada ben completa, pero as celebracións comezaron uns días antes, cando organizamos as exposicións para conmemorar tal día.

Comezamos o luns nalgunhas das aulas da ESO. Primeiro pensamos naquel libro que, por calquera que fora o motivo, deixara pegada en nós. Logo decoramos con eles as pegadas que recortaramos en cartolinas e ó día seguinte utilizámolas para decorar a zona de exposicións. Posteriormente montamos unha exposición con aqueles libros informativos ben fermosos dos nosos fondos e que aínda había quen non os coñecía... mágoa. Erro solucionado!!


O xoves, Día do Libro, algúns grupos da ESO baixaron á biblioteca para compartir os seus libros favoritos co resto do seu grupo. Eses favoritos cos que elaboramos un fantástico libro que deixamos no atril á porta da biblioteca. Foi unha xornada ben fermosa que seguro repetiremos. De cantos libros  marabillosos falamos, cantos lembramos... unha verdadeira celebración do libro e a lectura!!

Álbum de fotos


luns, 20 de abril de 2015

xoves, 16 de abril de 2015

Francisco Rodríguez e Rosalía de Castro

O pasado martes 14 de Abril, e dentro das actividades desenvolvidas nos Clubs de Lectura do Segrel, o club de lectura de pais e nais celebrou un extraordinario encontro con Francisco Rodríguez o recoñecido escritor, mestre e político, arredor da figura de Rosalía de Castro.

Este encontro xurdiu trala lectura de "A memoria da choiva" de Pedro Feijoo. Na xuntanza do club, algúns dos seus membros preguntábanse canto de certo habería da vida de Rosalía no argumento desta fantástica obra así que decidimos que ninguén mellor, para aclararnos todas as nosas dúbidas, que Francisco Rodríguez, estudoso da súa obra e autor, entre outras, de "Rosalía de Castro, estranxeira na súa patria".

Francisco Rodríguez clarificounos moitos aspectos da vida e da obra de Rosalía. botando fóra tópicos e prexuizos e amosándonos o seu carácter de muller culta, descendente dunha familia fidalga do rural, sen ningún tipo de trauma por ser filla de solteira e de crego, familia que tivo especial cuidado na súa formación. Rosalía estudou francés, música, literatura europea..., e tiña aspiracións para ser independente. Unha imaxe ben diferente da que se proxectou dende as institucións.

Francisco deixou ben claro que so hai que lela para coñecela porque na obra de Rosalía está "todo"...
  • "En las orillas del Sar": A Rosalía derrotada, a súa visión de Santiago.
  • "Jamás lo olvidaré": Conflitos entre a burguesía e o arzobispado de Santiago.
  • "Follas Novas" - "Nin ás escuras", "O encanto da pedra chan": Afectividade sexual, identidade de xénero, travestismo, homosexualidade...
  • "Eva": Un poema feminista.

Francisco leunos poemas e algunha das cartas nas que Souto Freire ou Pondal, entre outros, confesan a súa fonda amizade con Rosalía. 

E máis, moito máis, todo o que dou unha interesantísima e esclarecedora charla que durou máis de catro horas e que, de non ser que deron as nove da noite, aínda estaríamos de conversa... polo que non descartamos unha nova xuntanza.



mércores, 25 de marzo de 2015

Celebración do Día da Poesía

Hoxe, O Segrel encheuse de poesía, "Poesía por un tubo" que diría o noso admirado Carlos Negro, ou "Poemas susurrados" como nos propuxo hai uns días Gracia Iglesias no seu fantástico obradoiro "Si la vida te da limones... ¡haz poesía!".

Gústanos a poesía, así que para nós, calquera día e bo para celebrala, polo que non houbo problema para que o fixéramos o día 25 de marzo, cando o seu día foi o pasado sábado 21. 

A nai da Carla agasallounos cunha enorme caixa chea de tubos pequenos, que a rapazada se encargou de decorar, tamén prepararon os seus carteis de "Susurrador/a de poemas" e xa so quedaba elixir ese poema especial que logo "susurrarían" aos elexidos entre todos os membros da nosa comunidade, aínda que, por iso da vergoña, que a certas idades é moita..., todos os seus elixidos non foron outros que os seus compañeiros e amigos.

A verdade é que o pasamos ben facendo os preparativos, e tamén "susurrando poemas". Foi un xeito diferente de celebrar un día ben especial para todos nós.


mércores, 11 de marzo de 2015

Encontro Poético con Gracia Iglesias

O pasado martes, o Segrel encheuse de poesía e creatividade. A artífice desa tarde máxica foi Gracia Iglesias a quen descubrimos a través dos seus marabillosos "Gritos Verticales" que vos recomendamos. Unha xoia!


La tarde rompe en gritos verticales
y sobre sus espaldas
el aliento del mundo pesa herido de noche.
No es más que un espejismo este silencio


No encontro coa rapazada de 4ºESO, Gracia agasallounos cun fermosísimo recital de "Versos Diversos". Comezou con "Aunque cubras mi cuerpo de cerezas", e falounos do "Pudor", da "Tristeza", de "Un beso" e dun "Valiente" con "Distintos métodos para hacer elfantes"  achegounos a "El refugio" e amosounos "Los tacones de Ruth"  e con "Gritos verticales" falounos de "Un pájaro y su sombra".

Xa nos tiña totalmente engaiolados e, a partir de aí, unha performance "La cruda realidad" e as súas moi persoais formas de converter un limón nun poema. Os marabillosos poemas visuais de Chema Madoz,  máxicos "Corazóns lateversos", "Poemas sorpresa", "Poemas susurrados" e moito, moito máis. 

Logo chegou o tempo do profesorado. Gracia amosounos mil e un recursos para achegar a poesía á rapazada, Falounos de "Romper Haikus", de "Poemas susurradores", de mesturar poesía e música con "O cadaver exquisito", de como "facer voar as palabras"... de moitos e moi variados xeitos de construir o relato poético.

Foi esta unha fantástica experiencia que aínda ben non rematou, xa estabamos pensando nun próximo encontro con esta extraordinaria muller. Graciñas Gracia pola paixón que pos no que fas, polo teu amor pola poesía, e a forza coa que o transmites. 

Esperamos repetir este Encontro!!


domingo, 8 de marzo de 2015

Día da Muller


Este ano, como xa ven sendo habitual, o alumnado de 1º e 2ºESO participou na iniciativa organizada pola Concellería de Igualdade "Fene lendo mulleres" adicado este ano ás veciñas que contribuíron a escribir a historia de Fene. A lectura levouse a cabo o venres 6 ás 10.30.


No instituto organizouse unha exposición na que pretendíamos amosar o papel da muller na ciencia ao longo da histoira "A Muller na Ciencia", "Mulleres galegas" do mundo da ciencia e a cultura, e unha pequena "Visión Intercultural da Discriminación de Xénero"

Esta exposición complétase cunha selección dos fondos da biblioteca de literatura (novela, Banda Deseñada, Álbum ilustrado, poesía...) e cine que trata a temática da muller dende distintas perspectivas.

Álbum Fotográfico

sábado, 28 de febreiro de 2015

Día de Rosalía

O 24 de Febreiro celebramos o Día de Rosalía, pero nesta ocasión a celebración "Lectura de poemas e música" desenvolveuse en dúas xornadas, o martes 24 e o venres 27.

O 24 foi o alumnado de 2º de ESO, o protagonista desta lectura poética, mentres o venres foron o resto dos grupos da ESO. Nesta segunda xornada antes da lectura de poemas, visionouse un vídeo sobre Rosalía coa música de Negra Sombra interpretada por Luz Casal e Carlos Núñez. Un vídeo elaborado polo alumnado de 4ºESO e montaxe de Miriam Martínez e Javier Fernández.



xoves, 26 de febreiro de 2015

Encontros con David Rubín

Hoxe asistimos a dous Encontros co xenial David Rubín, pola mañá no Segrel, dirixido ao alumnado de 2º e 4ºESO, e pola tarde no CFR de Ferrol dirixido ao profesorado "A BD como recurso didáctico competencial e interdisciplinar". Sencillamente Extraordinario!!

David fixo un percorrido ao longo da súa carreira, sen esquecer os seus referentes, Jack Kirby, Frank Miller, David Mazzuchelli, Alan Moore, Moebius, Kevin O'neill e, por suposto, o Manga e Osamu Tezuka

A partir de aí, achegounos a todas e cada unha das súas obras e o interesantísimo proceso de creación. A primeira "El circo del desaliento", compilación de historietas curtas xa publicadas, máis a historia longa "Onde ninguén pode chegar" gañadora do premio Castelao de BD; "La tetería del oso malayo", outro recopilatorio de novelas curtas máis unha longa, "Cuaderno de tormentas" obra coa que comeza a utilizar as cores, utiliza novos formatos narrativos, e xoga coa composición das páxinas; "El Héroe" unha adaptación moi persoal do mito dos doce traballos de Hércules, obra que lle abre as portas do mercado americano, nada máis e nada menos que da man do seu admirado Paul Pope, e que el conquista, como non podía ser menos, coa súa marabillosa heroina "Aurora West""Beowulf" é a extraordinaria adaptación ao formato do cómic do primeiro poema épico anglosaxón, e, por suposto, "Viñetas de vida" esa emocionante e conmovedora carta á súa filla Auria, onde lle conta a súa experiencia en Burundi a través da súa colaboración coa ONG "Oxfam Intermón"

Tamén nos falou da segunda parte de Aurora West, a piques de entrar no prelo e, como non, da súa última creación, a que ten aínda entre máns "Gran hotel Abismo" e que, despois de contarnos cal será o seu fío condutor, xa estamos desexando ler.

A extraordinaria obra de David Rubín é resultado de anos de formación e de moito traballo; do seu desexo de experimentar con novos recursos, de ver distintas posibilidades e sobre todo de confianza en sí mesmo. "Ás veces non está mal apostar por un mesmo. Ás veces, ata sal ben..." 

Unha obra xenial na que David non oculta a influencia das súas filias e fobias, e na que os seus heroes, segundo a nosa rapazada, imítanlle ben, e coido que non van moi desencamiñados...




martes, 24 de febreiro de 2015

"Os fuxidos de Ferrolterra"

Esta mañá, e como peche das actividades que dende o pasado mes de xaneiro se desenvolveron no Segrel  arredor da Paz e a Non Violencia, recibimos a visita do historiador e escritor Bernardo Maiz.

A partir do documental "Xan de Xenaro. Memoria de 32 anos", que recrea un pequeno anaco do noso pasado a través da figura deste guerrilleiro veciño de Limodre (Fene), Bernando falounos da ditadura, da guerra "incivil" e dos homes e mulleres que formaron parte da oposición armada contra o franquismo na comarca de ferrolterra, facendo especial fincapé no papel fundamental das mulleres, mulleres silenciadas como Enriqueta Otero Blanco, María Blázquez, Fina Gallego Silva, e tantas outras...

Un documental con guión do noso querido e admirado Agustín Fernández Paz e do historiador Bernardo Maiz.

Outros Documentais: 


domingo, 1 de febreiro de 2015

Tomándolle a temperatura aos DDHH no noso centro - Respostas

O proxecto deste trimestre co alumnado de 2ºESO, un proxecto que elaborarán por parellas, trata o tema dos DDHH. 

Como defensores dos DDHH, viaxarán por distintos paises do mundo (España, Arxelia, Cuba, República Dominicana, Brasil, EEUU, Colombia, Reino Unido...) axudando á xente cuxos dereitos están a ser conculcados.

Pero antes de comezar, que mellor que tomarlle a temperatura aos DDHH no noso centro. Velaí tedes o resultado da enquisa que hai unhas semanas lles pasamos ao alumnado de 2º e 4º ESO.

Podedes sacar as vosas propias conclusións...


sábado, 31 de xaneiro de 2015

Cómics pola Paz

"Malala Yousafzai" Premio Nobel da Paz 2014
A vida de Malala, activista pakistaní, loitadora polo dereito á educación. 


"Imagine" de John Lennon
Unha das mellores cancións de todos os tempos segundo a revista Rolling Stone


venres, 30 de xaneiro de 2015

Poesía e Música pola Paz

Hoxe, celebramos o Día da Non Violencia e a Paz dun xeito ben fermoso. Ao longo da mañá o alumnado de ESO leu poemas aprol da Paz e a non violencia. 

Unha xornada na que non faltou a música. Uxía, 2ºESO, acompañounos ao piano, Sabela, 1ºESO, cantounos "A ronda do Soldadiño" e rematou o alumnado de 2º ESO cantando "Imagine" de John Lennon.

Foi o noso xeito de dicir NON á violencia, SI á Paz e á convivencia pacífica


xoves, 29 de xaneiro de 2015

Lecturas pola Paz

Con motivo da celebración do Día da Non Violencia e a Paz, dende a O Segrel organizamos unha exposición "Lecturas pola Paz".

Un xeito de achegar aos membros da nosa comunidade educativa parte dos fondos de Banda Deseñada, Poesía, Novelas e cine.


Exposición 

martes, 27 de xaneiro de 2015

Galegos en Mauthausen

A través da Asociación Memoria Histórica democrática chegou ao noso instituto a exposición "Galegos en Mauthausen" Unha homenaxe aos veciños de ferrolterra (Ferrol, Fene, Ares, Mugardos...) presos nos campos de exterminio nazi. Veciños que emprenderon unha viaxe ao horror e do que moitos deles nunca retornaron.

Unha exposición que coincidiu no tempo, coa data na que se conmemorou o 70 aniversario da liberación do campo de concentración de Auschwitz (27 de febreiro). 


Exposición que se completará, ao longo do mes de febreiro, con varias charlas dirixidas ao alumnado de ESO e Bacharelato, a  cargo de Enrique Barrera historiador e autor do libro "Galegos en Mauthausen".


Para saber máis...
El holocausto español
Mauthausen el campo de los españoles
Liberados de Mauthausen, olvidados en España
Así se organizaban los republicanos en Mauthausen




martes, 13 de xaneiro de 2015

Related Posts with Thumbnails