Entrega dos premios do III Certame de poesía

O venres 8 de maio entregáronse os diplomas correspondentes ao III Concurso de Poesía O Segrel do Penedo. Os gañadores foron José Roque Díaz Iglesias de 4º ESO A e Marcos Mauriz Díaz de 1º ESO A. Noraboa aos dous polo seu bo facer.

Podes ver o resto de imaxes accedendo ao noso álbum fotográfico

Concurso de poesía

Con motivo do 21 de marzo, Día da Poesía e comezo da primavera, e co obxecto de fomentar a creación literaria entre o alumnado, a biblioteca O Segrel do Penedo ven de convocar un novo concurso de poesía no que poderá participar todo o alumnado do centro. Establécense tres categorías, ESO, bacharelato e ciclos formativos. As composicións poéticas terán unha extensión máxima de 25 versos e poderán escribirse en lingual galega ou castelá. Os traballos poderán presentarse ata o 10 de abril e a entrega de premios será na semana do libro.

Pódese acceder a toda a información da convocatoria no documento do enlace.

Convocatoria do concurso de poesía

Encontro con Fernando Lalana

Este pasado luns o alumnado de 2º da ESO e o do club de lectura de 3º e 4º tivo un encontro co escritor aragonés Fernando Lalana, autor de multitude de libros entre eles La tuneladora, que é o que leu o noso alumnado. Fernando Lalana mostrouse encantado de participar nesta actividade coa rapazada do IES de Fene. Contoulles que aínda que estudou Dereito nunca exerceu porque encamiñou o seu traballo cara a escritura, primeiro á Literatura Infantil e máis tarde á Literatura Xuvenil, e non literatura para adolescentes como quixo deixar ben claro.

Unha vez feita a presentación e a primeira toma de contacto foron os rapaces e rapazas que participaban no encontro os que tiveron a ocasión de plantexarlle preguntas moi interesantes que sacaron á luz detalles das súas obras como que se valeu do coñecemento do cuartel de Melilla, onde el fixo o servizo militar, para ambientar a coñecida obra Morirás en Chafarinas e que se sentiu moi contento cando lle propuxeron levar esta obra ao cine. Tamén lle preguntaron sobre as súas coñecidas aficcións como son a colección de trens e as plumas. A este respecto contoulles que, aínda que se inspira en lugares e persoas coñecidos, en ningún caso utiliza os nomes reais salvo na novela Amsterdam Solitaire na que un dos seus personaxes é un amigo dono dunha tenda de estilográficas e na que o detective Fermín Escartín debe investigar o roubo da estilográfica máis cara do mundo. 

Todas estas anécdotas e moitas máis nos fixeron disfrutar dun momento marabilloso co autor ao que agradecemos que quixera vir a coñecer a estes xóvens lectores deste recuncho da Península.

 Podes ver o resto de fotografías neste enlace do noso álbum fotográfico

Acceso á web de Fernando Lalana

Flocos de millo pola paz

O pasado venres 31 de xaneiro conmemoramos no Segrel o Día Escolar da Paz e a Non Violencia que se celebra todos os anos o 30 de xaneiro. Para esta ocasión organizamos diversas actividades. Por unha banda desde a semana anterior está montada na biblioteca unha exposición de fondos que tratan sobre a guerra, a violencia e a paz; nesta exposición podemos atopar diversos xéneros, desde narrativa, poesía, banda deseñada e incluso cine.

O mesmo venres durante o primeiro recreo tivemos unha lectura de poemas acompañados da música que Celtia, alumna de 4º ESO, interpretou ao chelo, escollendo para a ocasión o fragmento O cisne da obra O carnaval dos animais. Ao remate da lectura as alumnas de Música de 1º de bacharelato, xunto coa nosa compañeira Navia Rivas, profesora de Filosofía, interpretaron Let it be dos Beatles. Marabíllanos como tocan o ukelele en tan pouco tempo que levan con el.

Finalmente os usuarios que nese día utilizaron o servizo de préstamo foron agasallados cun cucurucho de flocos de millo en referencia a este día tan sinalado.

Podedes ver un anaco da interpretación no seguinte vídeo.

 

 

Ademais convidámosvos a ver todas as imaxes da xornada na seguinte ligazón 

Obradoiro de Xosé Tomás

O pasado xoves 19 de decembro tivemos a sorte de contar co ilustrador Xosé Tomás. O deseñador gráfico tivo un encontro con alumnado da materia de Expresión Artística de 4º de ESO que aprendeu e disfrutou co saber e bo facer do autor. Ao finalizar o obradoiro asinou no libro da nosa bilioteca

Desde o segrel queremos agradecer a súa disposición para levar a cabo esta actividade.

 

(Fai clic na imaxe para ver o álbum completo)

Jólabókaflóð

 

Entre as diferentes actividades que propoñemos desde o Segrel para este Nadal destacamos o "jólabókaflóð". Este termo de orixe islandés significa "Inundación de libros" e dá orixe a unha tradición islandesa que data da Segunda Guerra Mundial e consiste en pasar a Noiteboa e o Nadal lendo, de aí que o agasallo tradicional destas datas sexa precisamente un libro.

Desde o Segrel quixemos darlle unha volta á tradición e poñer en práctica o noso particular "jólabókaflóð" e propoñer que en cada grupo se faga un sorteo ao estilo do "amigo invisible". Cada alumno agasallará a quen lle tocou en sorte un libro da súa propia colección e deberá pensar nun que lle guste ao agasallado. Ademais deberá escribir unha dedicatoria explicando o porque da elección. O día de Nadal cada un poderá ler o seu libro e sacarse unha fotografía que poderá remitir á nosa biblioteca para poder compartir a experiencia no noso blog.

Con esta actividade buscamos varios obxectivos. ao ser un intercambio de libros, evitamos as prácticas consumistas, incrementamos o interese e a motivación pola lectura e favorécense as relacións e os vínculos dentro do grupo contribuíndo así á mellora da convivencia.

Feliz jólabókaflóð!!!

Quen dis que es?

Chegou o Entroido ao IES de Fene e desde a biblioteca preparamos un concurso para pasalo aínda mellor se é posible. O venres 9 estaban previstas varias actividades con motivo do venres de Entroido, entre elas un concurso de disfraces e comparsas onde había unha actuación estelar, a comparsa de personaxes emblemáticos da literatura formada por profesorado do centro. Pois ben, o concurso organizado desde a biblioteca consistiu en tratar de adiviñar de que ían disfrazados os profesores e profesoras e aquel que conseguira adiviñar e completar o libro con máis personaxes sería o gañador. Resultou campión o alumno de 2º de bacharelato Daniel Portomeñe que foi quen de adiviñar as 18 personaxes que compoñían a comparsa. 

Noraboa!!!

Recomendacións Nadal 2023

 Desde O Segrel do Penedo desexámosvos un nadal cheo de lecturas.

Novembro, mes da ciencia no Segrel

Durante estes días temos na biblioteca unha exposición de biografías de cienctíficas e científicos galegos resultado dun traballo de colaboración entre o departamento de matemáticas e  o EDLG. Os traballos foron realizado polo alumnado de 3º e 4º da ESO durante o mes de novembro co motivo da celebración do mes da ciencia en galego.

 

Conmemoración do 25 N

Este sábado 25 de novembro conmemorouse o Día Internacional para a Eliminación da Violencia contra as Mulleres. No Segrel adiantamos as actividades para o venres 24. Nesta ocasión o alumnado da ESO, tomando como referencia o alcume de Mariposas, como se coñecía ás irmás Mirabal, elaboraron bolboretas de papel e nelas escribiron mensaxes en contra da violencia sobre as mulleres que xa ten causado moitas vítimas no que vai de ano. Con todas estas bolboretas e a colaboración de Antía Riveiro, alumna de 3º ESO, elaboraron un mural que colocamos no hall de saída ás pistas polideportivas.

Por outra banda, no segundo recreo reunímonos alumnado e profesorado de todo o centro para ler poemas e amosar o noso rexeitamento contra esta lacra.

Podedes ver o álbum completo na ligazón

Feliz aniversario Sra Curie

Hoxe, 7 de novembro, conmemórase o nacemento dunha das pioneiras na ciencia, Marie Curie. Foi a primeira muller en recibir o Premio Nobel e a única galardoada con dous. O primeiro recoñecemento foi o Premio Nobel de Física en 1903 xunto a Henri Becquerel e Pierre Curie, o seu home, e o segundo, xa en solitario, foi o Nobel de Química en 1911. Foi ademais a primeira muller profesora na Universidade de París, toda unha pioneira.

Mes de novembro, mes da ciencia no Segrel.

No seguinte enlace podedes acceder ao trailer da película Madame Curie omde se narra a súa vida

Madame Curie

Unha noite na biblioteca

A noite do 27 de outubro o alumnado de 2º da ESO quedou a durmir na biblioteca do centro, O Segrel do Penedo. Pasámolo estupendamente pintando cabazas e monstros, desfilando nun concurso de disfraces e ata xogamos a verdade ou reto, xogo no que a rapazada mostrou unha grande valentía desenvolvendo os retos máis tenebrosos que poidades imaxinar. Despois de cear e xa máis entrada a madrugada contamos lendas e historias de medo e vimos unha película espeluznante.

Unha noite inesquecible. 

Fai click aquí para ver o álbum completo

Cartel e Lema das Bibliotecas Escolares 2023 - 2024

Unha Biblioteca Escolar en Viñetas

"Agora a cousa cambiou bastante, pero eu recordo nos meus anos mozos, cando ía á escola, que os libros de texto para os nenos eran unha cousa espantosa, gris, cheos de letras e letras, e sempre pensei que os nenos aprenderían máis, non xa cos meus cómics, senón con calquera dos da miña época.

Eu véxoo cos meus netos: agora os libros dos críos teñen outra vez moitos debuxiños e tal, pero seguen sendo textos para ensinar. E eu creo que lendo simplemente as historietas, os nenos aprenderían moitísimo máis. Non tan só a ler ou a escribir, senón o que é a historia dun país, o que foi ocorrendo".

Francisco Ibañez, entrevista en Jot Down no ano 2017.

Como dicía Francisco Ibáñez na entrevista, a banda deseñada é un xeito diferente e marabilloso de aprender.

Pásate polo Segrel e visita a nosa sección de banda deseñada.

Comezamos!!

Xa estamos en marcha!!!! A nosa Biblioteca volve coma sempre, como o mellor lugar para ler, traballar, estudar ou tomarse un respiriño…UFFFF!!, participar nas nosas actividades, apuntarse o clube de lectura, formar parte do grupo de biblioteca…e non esquenzades a sección de xogos. Xa vedes, unha chea de cousas coñecidas e moitas novidades!!!

Pásate e descubre!!!

AVENTÚRATE!!!!

PROPOSTAS LECTURA VERÁN

Estas son as propostas de lectura para este verán feitas polas nosas alumnas voluntarias e algúns alumnos moi lectores:

17 de MAIO

Na biblioteca "O Segrel do Penedo"  celebramos o día das letras galegas co "Regalízate" (os rapaces debuxan a súa palabra favorita en galego de forma artística) e cunha pequeña exposición de libros de Francisco Fernández del Riego.

ABRIL:MES DOS LIBROS

«Unha habitación sen libros é como un corpo sen alma», Marco Tulio Cicerón

«O que le moito e anda moito ve moito e sabe moito» Miguel de Cervantes

21 de marzo: Día da Poesía

OS VENRES POÉTICOS

A razón desta actividade foi a de animar aos rapaces a ler poesía e ao fomento da lectura en xeral.

Mónica Porto, profesora de Lingua Castelá, foi a facedora e organizadora. E foi realmente un éxito.

Cada venres colgaba no tendal unha poesía e deixaba copias na biblioteca para os rapaces. Xunto coa poesía escollida, poñía unha breve biografía do autor/a.

Mónica escollía as poesías pero as máis das veces eran escollidas xunto cos seus alumnos/as. Hai  poesías en castelá, galego e inglés. O/as autor/as escollidos percorren varios séculos, dende o Século de Ouro ata o presente e os temas van dende as temáticas sociais ata as amorosas pasando polas cómicas. Así puidemos ler poemas de Nicanor Parra, Rainer María Rilke, Luisa Castro, BegoñaM. Rueda, Concha Méndez, Lope de Vega, José Emilio Pacheco, Emily Dickinson, Déborah Vukusic, Francisco de Quevedo, Gabriel Celaya, Rosalía de Castro e Beatriz Gimeno Reinoso.

Esta actividade foi o detonante para propoñer aos rapaces para que escriban as súas propias poesías e así organizamos o I concurso de Poesía O segrel do Penedo e os gañadores deste I concurso de Poesía foron Joel de 2º de BACH e Sara de 4º ESO.

E estas son as poesías gañadoras:

Recuerdos del trovador:

Pido perdón en nombre de mi vulgar idioma;

por no tener palabras que definan tu porte,

y en nombre de la marea roja aquí presente,

por pretender imitar el hedor de tal dama.

 

Siento haber consagrado cada rincón del alma

a perseguir entre tormentas ausente norte,

donde tenaz viento con intensidad advierte

que en esos mares Sejmet un desierto reclama.

 

Miro arrepentido aquellos requiebros ahora,

el sencillo sonar de guitarras me amilana,

son reminiscencias de estúpida ave cantora.

 

No reclames ya muerto el desdén piedad alguna:

cuando un roto corazón solitario llora,

roja gardenia se marchitó al fin cruel ventana.

 

¿Dónde te hallas rondador?

¿Ha muerto ya el ansia por el desvelo?

Se esfumó de ti el amor,

como el alba tiende rosáceo velo.

 

Fue la noche ignorancia,

que hizo tus dulces notas despertar.

Fue la pasión fragancia,

iniciadora de un fúnebre cantar.

 

Qué es el querer sino hipocresía,

que con loca e infantil algarabía

fuerza a ser de falso ideal arrullador.

 

Yoel Sanjuán Domínguez (2º BACH)

 

¡Pirata!

 

Tartamudeo

al escuchar tu voz

que suena como un ronroneo,

cuando solo estamos los dos.

Y ese sentimiento…

me aterra todo el cuerpo,

con mi frialdad y tu melosidad,

algún día me matarás.

Por qué ahora, a tus pies,

susurrar tu nombre es una sonata

¿de Beethoven? ¿de Vivaldi?

¡No me des tanto la lata!

Pirata, pirata ¡Pirata!

De ti me enamoré,

como de la música

el arte, la mitología y las tartas.

El motivo, tu cariño, que me encanta.

Y junto a esta carta

mi corazón canta lo que no tarda.

No me acomodaré en tus labios o sonrisa,

ya que lo nuestro no es una simple brisa.

No, lo nuestro será siempre,

la historia de un amor potente.

 

Sara V. Briceño Parra (4º ESO)

NORABOA!!!!!!!!! 

TRABALLANDO PRENSA NA BIBLIOTECA

Cada vez menos a rapazada le prensa. Cos alumnos de 1º ESO estivemos traballando a prensa na biblioteca durante varias sesións.

Expicámoslles a diferenza entre opinión e feito. A importancia de acudir a fontes fiables para contrastar unha nova. Leron novas nas diferentes seccións do periódico. E presentaron unha das novas do periódico respondendo as preguntas de que?, quen?, onde?, cando? e por que? 

8 de Marzo. Charla de Susana Ladra

Para conmemora o 8M,  Susana Ladra doutora en Informática e profesora na UDC deu unha charla ante alumnos de 8 IES da contorna no Pazo de Narón. 

Falou aos rapaces sobre a pegada dixital en Internet, do que saben de nós e do uso que lle dan. Explicoulles o que era o Big Data, deulles algunhas recomendacións para non deixar tanta pegada dixital e animounos a facer o grao de Ciencia de Datos, un grao con moito futuro.

A ponente foi presentada por Alba Rocha, alumna de 2º BACH deste IES. 

I CONCURSO POESÍA “O SEGREL DO PENEDO”

Co obxecto de fomentar a creación literaria entre os nosos alumn@s convocamos o 1eiro concurso de poesía “O Segrel do Penedo” con as seguintes bases:

 

BASES: 

Participantes: todo o alumnado do centro 

Día límite da entrega: 16 de marzo, xoves

Entregar a: Mónica ou Violeta 

Tema: libre, e o poema terá como máxima extensión 25 versos. 

Lingua: castelá ou galega 

Formato: en un folio, e cos datos do autor/a: nome, apelidos e o curso 

Categorías: ESO, BACHARELATO e CICLOS/FPB 

Xurado: un/ha profesor/a do dpt. de galego, outro/a do dpt. de castelá, unha persoa do equipo da biblioteca e unha do persoal non docente. 

Gañadores: haberá un gañador/a por categoría e un pequeno agasallo para o 2º premio. 

O fallo do xurado será inapelable e poderá declarar o premio deserto. 

Publicación: Os poemas gañadores serán publicados no blog da biblioteca. 

Entrega dos premios: O martes 21 (día da poesía) no 1eiro recreo na biblioteca

 - A participación neste concurso implica a aceptación das bases- 

 (Organiza a biblioteca e colabora o dpt. de lingua castelá e galega)

 

ANIMÁDEVOSSSSS!!

23 febreiro, aniversario de Rosalía de Castro

Fixemos cos ESO unha escolma dos libros de Rosalía que temos na biblio, leron os seus poemas, falaron da súa vida e pintaron unhas fermosas caricaturas da poeta.