Suxestions Lectura Nadal 18

Clica nas Portadas e lerás as reseñas  

Non á Violencia Machista

Hoxe, a comunidade educativa do IES de Fene vestímonos de negro para dicir ben alto e forte "Non Á Violencia Machista".

Durante toda a xornada lectiva, os distintos grupos de ESO, Bacharelato, FP e ESA xunto co seu profesorado visitaron a exposición de literatura e cine contra a violencia machista e amosaron o seu rexeitamento a esta terrible lacra social que anos tras ano nos deixa uns datos arrepiantes:

 

45 mulleres asasinadas no que vai deste ano (2018)

973 mulleres asasinadas dende 2003.
27 menores asasinados dende 2013.
228 orf@s dende 2013.

Ao longo desta semana nas distintas materias traballouse en diferentes proxectos como:

O alumnado hiperbárico de CM de FP, coa colaboración do alumnado de FP Básica, elaborou un mural de bolboretas en recordo das 45 mulleres asasinadas no que vai de ano. 

O alumnado de 3ºESO, 4º ESO e Bacharelato está a debater, na materia de Inglés, sobre os "micromachismos"

Ao remate da xornada alumnado e profesorado saímos ao patio para dicir NIN UNHA MENOS!

Clica na Imaxe para ir ao Álbum

Unha Noite na Biblioteca!

No mes das Bibliotecas, que mellor xeito de celebralo que pasando a noite de Samaín na nosa biblio!

Fixémoslle a proposta ao alumnado de 1ºESO e aos membros dos clubs de lectura da rapazada e nin imaxinades como foi a acollida...

O venres 26 ás 7 da tarde comezou a chegar a rapazada, algúns xa viñan disfrazados da casa, outros fixémolo no centro e o primeiro que fixo o alumnado do club de lectura de 3º e 4º axudados por Roberto, o noso auxiliar de linguas, foi decorar a biblioteca, Deixárona terrorífica!!

Logo chegou a sesión de baile a cargo de Lidia Redondo unha extraordinaria profesional que fixo posible que Michael Jackson nos acompañara nesta noite festiva. Canto gozamos co seu Thriller!!

 

Despois do baile que mellor que unha boa sesión de cine mentres ceábamos, e a peli elixida non podía ser outra que Coco nesta noite de Samaín. Unha noite na que, durante a peli, tivemos unha visita terrorífica... Meu deus, tremendos berros!!

E tras o cine, xogos e lectura de lendas... Unha noite ben completa!!

E ás 8 da mañá xa estaba Clara co almorzo disposto, café, colacao, chocolate, biscoito, tostadas, zume natural... había que recuperar as enerxías perdidas despois de tanto baile e tanta festa.

Clica na imaxe para ir ao álbum

Propostas Lectura Verán 2018

Contra a discriminación e celebrando a diversidade 

Por un verán cheo de lecturas compartidas!! 

Diversidade Sexual

Esta mañá, no Segrel, alumnado de 4ºESO e dos clubs de lectura de 2º e 3ºESO asistiron a un encontro con Hugo Pérez para falar sobre diversidade sexual.

O obxectivo deste encontro é facilitar que o alumnado reflexione sobre a diversidade de identidades, e Hugo faloulles dende a súa experiencia vital dun mozo transexual, sempre dende unha prespectiva moi positiva e sen esquecer o extraordinario papel que desempeña en todo o seu proceso a familia e as amizades que sempre estiveron e seguen a estar ao seu carón.

Na última parte deste encontro coñecemos a Loli, a nai de Hugo, una muller moi forte e valente que nos falou de todos os estados polos que pasou, dende a negación da realidade que lle estaba a tocar vivir, ata a aceptación total.

Hugo foi moi directo, falounos de sentimentos, emocións, cunha idea moi clara, hai que visibilizar e derrubar estereotipos e prexuizos fomentando sempre a empatía e o respecto á diferencia.

POR UN CENTRO LIBRE DE LGTBFOBIA

Álbum do Encontro

Propostas de lectura

Platero, Lucas "Trans*exualidades"

Encontro Avós e Avoas - INEIN

Esta mañá, O Segrel tivo unha visita moi especial, as avoas e os avós do alumnado de 1ºESO da materia de Investigación e Tratamento da Información.

Este trimestre fixemos un pequeno proxecto que nos levou ata os anos 50 e 60 do século pasado "A escola dos nosos avós e avoas". 

Foi un proxecto ben interesante xa que a rapazada lle fixo unha enquisa aos seus avós e avoas, algúns deles grabaron vídeos e audios, fixeron unha boa pescuda para atopar materiais e a partir de aí déronlle forma ao seu proxecto. 

O máis fermoso, e do que nos sentimos ben orgullosos, foron as conclusións que del sacaron...

"A entrevista co meu avó foi moi interesante, porque cando lle preguntaba algo, eu quería saber cada vez máis. Había preguntas nas que eu alucinaba porque o cambio é moi grande. No seu colexio non había case nada. Con esta entrevista aprendín que aínda que non teñas o mellor colexio, o máis importante é divertise e aprender o máximo"

Iván

"Gustoume moito facer este traballo, xa tiña unha pequena idea dos colexios dos meus avós porque alguna vez falo con eles das cousas dos seus tempos, pero moi pouco, e agora doume de conta de que é moi interesante"

Brais

"Eu creo que os nosos avós tiñan moitas máis dificultades para ir ao cole e gozar, e que nós somos moi afortunados. Aprendín moito facendo o traballo xa que nunca falara cos meus avós sobre este tema"

Roi

"Eu creo que o colexio dos nosos avós era moito peor que o noso porque non tiñas calefacción e os profesores pegábanlles. Este traballo gustoume moito porque descubrín todo o que non sabía sobre como eran as escolas dos nosos avós"

Serxio

"Foi unha boa experiencia realizar esta actividade xa que puiden coñecer mellor como era a vida do meu avó e poder reflexionar coas historias que me contaba"

Aitor

Clica na imaxe para ir ás presentacións

Presentación Alexia, Silvia e Nerea

Álbum do encontro

Encontro "Séchu Sende"

"Made in Galiza ou como as palavras poden mudar o mundo"

O venres, día 1 de xuño, no Segrel do Penedo contamos coa presenza de Séchu_Sende, escritor e profesor de Lingua e literatura galega no IES Marco do Camballón en Vila de Cruces.

O departamento de galego, organizador do encontro, convocou, nesta ocasión ao alumnado de 3ºESO.

Séchu estivo a falar de amor, de sexo, de sociolingüística, de literatura, de como se iniciou no mundo da escrita etc, pero sobre todo do afortunadas e afortunados que somos por poder contarmos cunha lingua propia que nos abre a porta para comunicármonos con 250 millóns de falantes. Seguindo a súa liña, todo estivo adubado con grandes doses de humor, amor e optimismo.

Álbum fotográfico do Encontro

Blog de Séchu Sende

Antonio Pampliega "Os Ollos da Guerra" (1)

O pasado martes 15 de maio, O Segrel recibiu unha visita moi especial. O fotoxornalista Antonio Pampliega achegounos a crúa realidade do "outro lado do muro". Foi os ollos das guerras de Siria, de Libia... da fame en Somalia, dos refuxiados que chegan ás costas europeas... Un encontro no que non quedou fóra o papel da prensa "Xogámonos a vida por eles (os sirios) e por vós, para que esteades ben informados e non vos engañen" [...] "Debedes ser críticos coa información. Non vos deixedes engañan nen manipular, informádevos ben, logo tomade as vosas propias decisión"

Foi a voz dos sen voz que removeu as conciencias de todos os asistentes. "A indiferenza fire máis que as guerras". Máis non foi a indiferenza quen aniñou nos corazóns da nosa rapazada, tal e como queda reflectido nas súas reflexións, das que vos deixamos aquí algún exemplo:

"Creo que todos deberíamos oir as súas palabras, ver as súas fotos, os seus videos, oir eses audios. Antes da charla non tiña en mente o que era unha guerra, senón a palabra -guerra-. Pero, que é una guerra? Que se ve e vive nela? Iso é o que nos trouxo Antonio Pampliega á aula dun instituto. Tróuxonos a guerra mesma. Púxonos en situación, chegounos ao corazón e abriunos a mente a cada un de nós. Púxonos os pés na terra para que comecemos a facer algo xa. Daranse pasos pequenos, pero daranse, que é mellor que non dar ningún"

Aroa 4ºESO

"Eu non o coñecía pola súa persoa, senón por ser o home que fora secuestrado 299 días por Al-Qaeda en Siria. Fascinoume o seu traballo e a paixón que ten, e que, a pesares de todo o vivido, segue sendo respectuoso ata cos asesinos dos seus compañeiros. Aclaroume dúbidas que tiña sobre o seu traballo, non chegaba a entender de todo porque arriscaban a súa vida (guiábame polo que dicían na miña casa, o típico de que eles o buscan, e aínda que non estaba de todo de acordo porque debía de haber una explicación detrás, eu non lle atopaba explicación) agora entendo todo e despois da charla teño moitos máis argumentos, de verdade, sigo fascinada"

Paula C. 3ºESO

Clicar para ir ao álbum

Artigos en El País

Entrevista en Radiofusión Fene

Reflexións alumnado

Antonio Pampliega "Los ojos de la guerra" (2)

Antonio Pampliega "Os ollos da guerra" (1)

Francisco Rodríguez "Rosalía de Castro"

O día 11 de maio, o departamento de galego organizou no Segrel un encontro con Francisco Rodríguez, político, profesor e crítico literario.

Nesta ocasión, o encontró ía dirixido ao alumnado de 3ºESO para falarlles da figura e a obra de Rosalía de Castro.

En primeiro lugar, fixo una breve introducción sobre a figura de Rosalía, no seu contexto histórico e socio-cultural para, a continuación, proceder á lectura e interpretación de varios poemas de Cantares Gallegos e Follas Novas. 

Día da Poesía & Día do Libro

Este curso, decidimos celebrar conxuntamente o Día da Poesía e o Día do Libro.

A idea era expoñer algún dos Proxectos "Enjoying Poetry" que na materia de Inglés se veñen realizando en 4º ESO dende hai xa varios cursos. 

A rapazada achégase á Poesía a través de Caligramas, Acrósticos, Haikus... e compoñen os seus propios poemas que logo agasallan, nun soporte deseñado por eles mesmos, a esa persoa especial na súa vida. 

Deste xeito, os seus libros de poemas encheron a sala de exposicións.

Clicar para ir ao álbum

Día Internacional de Pi

O Departamento de Matemáticas, coa colaboración de distintos departamentos, organizou a celebración do Día Internacional de Pi con varias actividades:

Exposición do número Pi onde aparecen as súas aplicacións ás distintas materias que se imparten no centro, como por exemplo: 

• Literatura: "El Quijote" nos decimáis do número Pi
• Valores: O corto "Pipas"
• Soldadura e Caldeirería: Desenvolvemento lateral do cilindro
• Educación Física: Atletismo
• Arte: No "Palais de la Découverte" de París
• Estatística: A "Campá de Gauss"
• Orientación: Daniel Tammet "O rapaz do cerebro incrible"
• TICs: Como calcular os decimais do número Pi
• Grego: "Deus sempre fai xeometría" Platón
• Inglés: "Pi day"
• Na Cultura Galega: Na "sella" ou nas "muxidoras"
• Un Menú Galego: A tortilla "circular" a cunca "semicircular"...

Pi Photocall durante os dous recreos do mércores 14. Premiaranse as fotografías máis orixinais.

Clicar para ir ao álbum fotográfico

8M DÍA DA MULLER

"Nós, as mulleres" é o título da exposición que se pode visitar na sala de exposicións do Segrel. Unha exposición que abrangue distintas facetas e épocas.

"A muller na poesía" nas voces de Rosalía, Ana Romaní, Celso Emilio Ferreiro, Marilar Aleixandre, Monserrat Abelló, Iolanda Castaño, Carlos Negro, Amaia Lasa, Pilar Pallarés, Luisa Castro, Talisma Nasarin, Berta Villanueva, María Yongsusg, Asun Estévez e Manolo Rivas.

"A muller na ciencia" no papel de grandísimas mulleres como Rita Levi Montalcini, Ada Lovelace, Jane Goodall, Emy Noether, Rosalind Franklin, María Josefa Wonenburger, Margarita Salar, Laura Sánchez Piñón, María Victoria Lareu, Bárbara McClintock, Concepción Herrero López, Hipatia, María Antonia Ferrín Moreiras e Ángeles Alvariño.

 

"A muller traballadora" dende aquela muller dos anos 50 educada para servir ao home, ata a muller do século XXI. Unha muller que traballa a reo máis ten que sufrir precariedade, inseguridade laboral, discriminación salarial, falta de corresponsabilidade nos coidados e nas tarefas domésticas, violencia sexual... Ata cando?

Clica na imaxe para ir ao álbum

 E o vindeiro venres ás 11.15 charla "A muller na ciencia"

Día de Rosalía "Abrindo a Fiestra"

#AbrindoAFiestra no Segrel. Así celebramos o Dia de Rosalía. A súa voz, a través da nosa razapada, encheu cada recuncho da nosa biblioteca.

Se clicades na imaxe de Rosalía veredes @s verdadeir@s protagonistas desta xornada festiva...

Cada grupo comezou coa lectura do Manifesto da AELG "Abride a Fiestra"

Abride a Fiestra 

Nun mundo de fiestras pechadas, buscamos o refacho de vento que as abra de vez. Nun mundo que busca facer as comunidades e as persoas máis pequenas, os cartos e a cobiza máis grandes, precisamos forza e profundidade, emoción e pensamento. Ante as fiestras pechadas contra a vida, contra as voces das mulleres, das desprazadas e das nosas outras cómprenos unha palabra firme e abranguente que nos guíe. No bater das fiestras que cheiran a couza do pasado, a mentiras que repetidas mil veces queren chegar a ser verdades, a fala que se nos rouba e aire que nos falta precisamos a bravura das mareas e o salvaxe das montañas. Precisamos todo do que falou e todo o que foi Rosalía de Castro.
Ela é o refacho que busca abrir as nosas fiestras. Un refacho que chega dende o pasado para nos falar do futuro. Un refacho que quere abrir a fiestra para que poidamos navegar. Coa forza das baleas, da que busca novas fillas do mar, da que se ri dos papeis de xénero e nos anima a redefinilos como literatas. Un refacho que trae a voz de todas as meniñas gaiteiras que están por chegar. Un refacho que canta a vida e transforma todo dende as raíces.

Mais para que o refacho entre, precisa da nosa vontade. Pídenos, imperiosa: Abride a fiestra!

E na nosa man está abrir a fiestra. Abrila para vermos a muller, a escritora, a irredutible. A voz que nos une ás rebeldes do mundo, que fascina coa súa luz por onde pasa, que nos ofrece a súa clarividencia para tecermos novas alianzas, a que sempre está do lado da xustiza, do noso lado, a que sempre está aínda por descubrir. Porque en todos os recunchos do mundo, mais sobre todo aquí, en Galicia, hai rosalías que cantan e que falan, alancando con brillantes e destemidas botas azuis entre a lama.
Rosalías que abrimos a fiestra saíndo á rúa contra o espolio da terra que ela cantou, ecolóxica antes de que existise nin o termo. Cada vez que nos negamos a seguir converténdonos en plantación de eucaliptos, minas, xeriátrico e mercadoría, reivindicando a paisaxe que ela utilizou politicamente coma ninguén. Cada vez que pulamos polo público, a sanidade, o transporte, as axudas a quen está na marxe e ela puxo sempre, dende o afecto e a transgresión, no centro. Cada vez que desfacemos o discurso que sustenta a violencia de tantos Pedros mediante a escrita e a acción feminista, contra todos eses que seguen ladrando mentres nosoutras camiñamos.
Abride a fiestra para as viaxes interiores, para a coraxe dos afectos, para sermos das que non temos medo de pensar e de sentir simultaneamente, de recoñecernos mulleres con palabra e voz propia, herdeiras e compañeiras daquela que en cada dedicatoria se recoñecía nas súas iguais.
Abride a fiestra á afouteza e ao abraio, á redefinición do que a historia dos homes fixo de mulleres irreverentes coma ela.
Abride a fiestra porque Rosalia de Castro é o mundo que está por facer. Un mundo que se abre se o abrimos.

  María Reimóndez

Carreira Solidaria na Semana da Paz

O vindeiro venres, 2 de Febreiro, e por segundo ano consecutivo, celebrarase na pista de atletismo unha Carreira Solidaria a prol da ONG Proactiva Open Arms.

Durante toda a semana o alumnado deberá buscar patrocinadores (entre os membros da familia, amigos e profesorado) que se comprometerán a abonar 1€ por cada volta que cada un dos seus patrocinados dea á pista durante o tempo que transcorra a proba.

ESO: 1º Recreo

Bacharelato e CCFF: 2º Recreo.

A cantidade recadada será ingresada na conta da ONG

Depende de todos nós que esta iniciativa chegue a bo porto. 

Por todos eles, por todas elas, por todos nós!!!

"Non hai máis que unha educación, o exemplo"

Gustav Mahler

Encontro con Xosé Manuel Sarille

O martes 16 de xaneiro contamos no club de lectura de pais e nais coa resenza de Xosé Manuel Sarille, autor do libro Polos fillos dos fillos. E deste xeito, puidemos comprobar de primeira man coma os dramáticos sucesos que tiveron lugar en Montecubeiro, durante a Guerra Civil, marcaron profundamente a xente do lugar, e, concretamente, a familia Sarille.

Xosé Manuel ponlle voz á historia que lle conta seu pai e aos acontecementos que viviu de neno. Deste xeito, historia e novela fúndense nun relato que non nos deixa en absoluto indiferentes e condúcenos a un efecto de inmersión que nos provoca unha marea de sensacións sobre o que puideron sentir os personaxes que na historia se describen.

A lectura do libro supuxo a lembranza de acontecementos xa coñecidos e o posterior coloquio co seu autor aclara moitos matices do mesmo. En definitiva, vivimos unha tertulia literaria mesturada con unha análise da historia recente dende a perspectiva das distintas xeracións que formamos parte deste club.

                                                           Clicar para ir ao álbum