Xabier Docampo no "Canal YouTube de Radio Barullo"

O pasado mércores, recibimos a visita de Xabier Docampo. O alumnado de 1º e 2º de ESO disfrutou da súa charla.

O seu libro “Cando petan na porta pola noite” foi o primeiro que limos no Club de lectura e na sesión do club fixeron comentarios ben interesantes que unha vez diante do “autor” parece que non foron quen de facelos, deberon ser os nervos...

Xabier Docampo falounos de literatura, de libros, de escritura…

“Eu non estou orgulloso dos libros que escribín, o que si estou é orgulloso dos libros que lín”

“Lendo decateime que os libros falaban de min… contaban o que eu sentía, ou eu sentía o mesmo que sentía o autor”

“Eu, escribo tamén para lerme. Impórtame o que escribo, para lerme”

“Eu podo vivir sen publicar, o que non podo é vivir sen escribir. Se non escribo non sei quen son”

A charla foi ben amena, Xabier sabe como chegar aos rapaces, e aos nosos chegou e de que xeito!! Fixo que se sentiran moi a gusto e que disfrutaran da súa conversa.

Gracias Xabier, por facerlles ver que a lectura pode ser un verdadeiro pracer!!

E para rematar, asinounos a profes e alumnos, algúns dos seus libros e tamén asinou no noso Libro De Ouro.

Visitade Radio Barullo e a través do seu Canal Youtube podedes ver o encontro que mantivemos con este magnífico escritor.

Roteiro polas Bibliotecas Escolares (V): O IES Alexandre Bóveda

Acta, informal, do acontecido a mediados de maio en Vigo e arredores:

O comité de recepción (Beni) na porta principal. O señor director no recibidor. O xefe de estudos pendente da nosa chegada. Que ben saben facer as cousas no IES Alexandre Bóveda de Vigo. Como se esmeran cando son visitados-inspeccionados polo inspectores de bibliotecas escolares.

Os GBI (A nosa biblioteca, Biblioafonso e O Segrel do Penedo) tivemos insistentes chamadas para visitar a biblioteca deste centro de Vigo. Mesmo tivemos que pospoñer outra visita xa concertada con anterioridade. Que nos quería amosar Beni? Cal era a razón da súa insistencia?
No recibidor do centro xurde, desde o século XIX, Xulio Verne. O globo dalgunha das súas famosas novelas sobrevou as nosas cabezas. Todo o que se pode expoñer sobre o autor francés, incluso a noticia da súa presenza en Vigo, está amosado na completísima exposición que enche de vida os corredores do Alexandre Bóveda. Traballo de moitos meses reflectido nas paredes.
Pero, onde estaba a biblioteca?

Por fin, tras múltiples explicacións sobre a colaboración dos departamentos (magnífico polbo realizado por Cristina de plástica) e os contidos da exposición, conseguimos entrar na biblio. Mais, que é unha biblioteca? un almacén de libros ordenados, tan só iso? Sofás, ordenadores, televisor, canón de vídeo, dvds, revistas e libros, moitos libros nun espazo atractivo e agradábel. Polo tanto, se xulgáramos a calidade dunha biblioteca pola utilización que dela fan os seus principais destinatarios (o alumnado) o IES Alexandre Bóveda, conta cunha extraordinaria biblioteca. Biblioteca que non só ten un curruncho para Xulio Verne senón que tamén ten un zombi, si, si, un auténtico zombi para animar á lectura e á busca de información. Ai se o seu traxe falara!!!

Tras a inspección, degustamos?, devoramos? un suculento guiso de peixe no restaurante Camineira en Aldán acompañados por todo o grupo da Biblio. Foi unha comida ben agradábel na que rimos e falamos de libros, dinamización, Bibliotecas Escolares, reivindicacións...

E despois da comida que? Unha viaxe na que quedamos abraiados coa beleza desta ría e impactados coa fermosura do conxunto arquitectónico de santo André de Hío. Difícil será superar a calidade da acollida recibida polos GBI. Quen se atreverá a organizarnos a seguinte inspección deste grupo despois da visita a Vigo-Aldán?

Grazas Super Beni, Sara, Cristina, Paco... a nosa primeira saída oficial fóra da provincia da Coruña tivo un resultado excelente.

Que se vaian preparando por Monforte!!!

Outros Roteiros
CEIP Milladoiro-Malpica
CEIP José Cornide (A Coruña)
IES Uxío Novoneyra (A Coruña)
IES de Arzúa

Tamén nos outros GBI Blogues
A Nosa Biblioteca
Biblioafonso

Toy story

Había unha vez tres lindas princesas que foron á academia de policía.

A súa misión foi levar a toda esta tropa...

...a unha exposición.

Día das Letras Galegas

O pasado venres celebramos o Día das Letras Galegas.

Sempre é un día grande no IES de Fene, pero nesta ocasión foino, se cabe, un pouco máis pois tamén celebrábamos o premio acadado polo blogue da nosa biblioteca.

O Segrel do Penedo, “2º Premio de Blogues de Centros” no II Premio Espiral Edublog.

As actividades comezaron ás 10.25 con “Poemas para Un Día”, actividade realizada polo alumnado de 1º e 2º de ESO e na que a poesía galega e os seus autores son os protagonistas principais.

Cada alumno confecionou o seu libriño de poemas e os gañadores da proba leron un poema elixido por eles en Radio Barullo.

Ás 11.15 pasamos á seguinte actividade “As Caras das Letras". Nesta ocasión, os participantes tiñan non só que organizar o seu libro con distintos autores aos que se lles adicou o Día das Letras, senón que tamén debían buscar certa información sobre os mesmos.

Mentras, o alumnado de 3º de ESO, e durante dúas horas, realizaba unha Webquest sobre Álvarez Blázquez. Webquest froito dun traballo colaborativo entre o IES Afonso X de Cambre e o IES de Fene.

Despois do recreo, que algún dos equipos participantes prefiriu dedicar a rematar as probas anteriores, comezou a segunda parte da celebración na que participaban todos os grupos, dende 1º a 3º de ESO. (Nesta ocasión non tivemos conosco ao alumnado de 4º xa que tiñan unha saída á Coruña)

Ás 12.30 comezou a Xincana Cultural, oito probas que remataban cunha novidade, a lectura dun acto da obra de teatro "O cartafol de Ruperto" de Xosé Agrelo Hermo.

Tamén enchemos os corredores que levas á nosa biblioteca coas suxestións de lectura dalgún dos nosos libros favoritos. Nesta ocasión fixemos nosa unha actividade que propón o protagonista dunha das historias da última obra de Agustín Fernández Paz "O único que queda é o amor" e que dende aquí recomendamos a súa lectura.

E como non, tamén participamos no festival "A Mocidade Coa Lingua" que tivo lugar no Parque Raíña Sofía en Ferrol coa actuación do grupo "Matutanos" formado por alumnado de 3º de ESO e 1º e 2º de Bacharelato.

Os rapaces e rapazas participaron nunha serie de actividades nun contexto onde a busca de información, os libros, a literatura, a nosa cultura, a música e a diversión estiveron presentes ao longo de toda a xornada. Todo un éxito.

Parabéns a todos e todas as participantes, alumnado e profesorado. O ano que ven máis!!!!!

Os Nosos Venres Musicais (XVIII)

Recibimos un e-mail de Nilo, un camioneiro checo que fai a ruta Praga–Narón todas as semanas. Sempre para a comer en Vega de Valcarcel. Alí coñeceu a Elba, unha profesora de galego no Bierzo. Empezaron a falar porque os dous, despois do postre, sempre se levantaban a tomar o café na barra para escoitar as noticias do telexornal. Nilo volveu ao camión despois de dous meses sen traballar, por culpa dunha lumbalxia, e está bastante preocupado porque non atopa a Elba. Pídenos axuda para ver se somos quen de volver a poñelos en contacto e quere que lle dediquemos esta canción de Willie Nelson...

Tamén nos di que Elba lle prestou un libro moi chulo, “Galicia en cen prodixios” e que el atopou un prodixio máis, porque lle parece ben raro que, nun país con tantos ríos, alguén puxera un letreiro tan grande a un regato na A6 a uns dez quilómetros de Lugo.

Nota da redacción: ás cinco horas de publicar esta entrada, recibimos un correo de Elba no que nos pide a versión de Katie Melua dun vello tema de Cannet Head, para dedicarllo a Nilo e decirlle que o prodixio do letreiro ten unha explicación, aínda que a ela lle interesa máis a marabilla de volver a saber del.

Agustín Fernández Paz no IES de Fene (II)

Se queres saber que obras de Agustín Fernández Paz hai nos fondos da nosa biblioteca preme na imaxe, e para ampliala só tes que entrar en "Options" e elixir "Single page mode"

E non deixes de entrar en Radio Barullo para disfrutar dalgúns dos momentos do seu paso polo noso Instituto.

Non queremos deixar de disfrutar da visita de tantos e tan bos amigos que pasan polo IES de Fene, e por iso hoxe inauguramos o noso Canal Youtube e a verdade é que non podíamos ter mellor padriño.

Que o disfrutedes coma nós!!!

Agustín Fernández Paz no IES de Fene

Hoxe, no IES de Fene, tivemos a enorme fortuna de poder disfrutar da presenza de Agustín Fernández Paz.

Esta mañá e durante hora e media, que nos soupo a ben pouco, reunímonos o alumnado de 2º e 3º de ESO, os membros do Club de Lectura e algúns profes, con este home extraordinario e que fixo a ledicia de todos e todas nós. Tamén tivemos unha “invitada especial” Antía, alumna de 2º de bacharelato, unha boa lectora e mellor escritora, e cuxo libro favorito, que recoñece saber case de memoria, é “Corredores de Sombra”. Como é lóxico, non quixemos que perdera a oportunidade de escoitar ao seu escritor favorito.

Agustín falounos do “chispazo”, de como xorden as ideas das que despois saen as historias, de cal é o proceso que el segue para escribir as súas novelas, dos 6 ou 7 borradores previos ao definitivo “Salvo aos xenios, e eu non o son, ás persoas normais as cousas non nos saen á primeira”. Ensinounos o seu borrador cero, esa marabillosa libreta amarela, unha xoia que nos permitiu non só ver, senón ler e fotografíar.

Este home tan cercano, afable, e fantástico contador de historias, engaiolounos a todos, e notouno nos nosos ollos, e así nolo fixo saber na súa despedida.

Como dixo Inma, profe de Ciencias, “Se alguén non tivera lido un dos seus libros, despois de escoitalo non deixaría de facelo. Vaia xeito de fomentar a lectura!”

E rematada a conversa algúns rapaces e profes achegámonos co noso libro favorito para que no lo asinara. Por suposto que tamén asinou no Libro de Ouro de O Segrel do Penedo.

Non podería haber xeito mellor de comezar a celebración do Mes das Letras.

Nuns días, e a través de Radio Barullo, poderedes disfrutar do video desta conversa con Agustín Fernández Paz.

Entrevista a Antía dende Radio Barullo

Esta semana, e despois de superar algúns problemas "técnicos" Radio Barullo sae novamente á blogosfera cunha entrevista a Antía, alumna de 2º de bacharelato, gran lectora e mellor escritora, e agora tamén compoñente dun dos grupos musicais que se formaron este curso no instituto "Los Matutanos".

Nos vos perdades a entrevista que lle fixo Roberto.

Finalistas II Premio Espiral!!

GRACIÑAS A TOD@S !!!

Picade no logo e teredes a relación dos finalistas grazas a ANB

1ª Xuntanza do Plambe-Ferrol

Hoxe, día 5, do mes 5 ás 5 da tarde reunímonos no CFR de Ferrol 9 responsables das 13 bibliotecas escolares de Ferrolterra incluidas no PLAMBE. Realmente éramos 11, pois dúas compañeiras xustificaron a súa ausencia e prometeron non faltar á seguinte. (A inauguración da Biblioteca de Somozas é causa máis que xustificada para non vir. Están cos preparativos da celebración!!!! Dende aquí enviámoslles os nosos parabéns.)

Nesta ocasión fixo de mestre de cerimonias Antón Cortizas, en Sanxenxo foi Pilar Sampedro, así que os dous quedan nomeados "Membro Honoris Causa" do grupo Plambe-Ferrol.

Comezamos presentándonos, xa que non nos coñecíamos todos, e expoñendo o motivo que nos traía á reunión, que non era outro que "botar a andar unha nova etapa de colaboración e reflexión compartida". O traballo colaborativo, a posta en común das nosas experiencias e tamén, como non, facer terapia de grupo, que sempre ven moi ben, é causa máis que suficiente para este "mini-encontro plambeiro".

Falamos do que estamos a facer, dalgúns dos nosos proxectos, fixemos terapia... e despois dunha hora longa de conversa, chegamos ás seguintes conclusións:

• Reunírmonos unha vez ao mes. A próxima reunión será o luns 2 de xuño ás 5 da tarde no CFR de Ferrol

• Reunírmonos unha tarde para irnos poñendo ao día nesto das novas tecnoloxías.

• Redacción dun escrito para enviar á Dirección Xeral, á Asesoría de Bibliotecas Escolares e ao CFR de Ferrol no que queremos reivindicar:

• A asesoría de Bibliotecas Escolares no CFR de Ferrol

• O recoñecemento da figura do/a Responsable da Biblioteca Escolar no ROC

Creemos que para ser o primeiro día, e chegar todas unha miaxiña tímidas, non o fixemos nada mal, non si?

O noso desexo é que este sexa o principio dunha nova andaina positiva e enriquecedora para todas nós. Do traballo colaborativo é de onde saen as mellores experiencias.

Tamén en:

Biblospazos
Blogfesquío

Que mellor no "Día do Ensino"?

Hoxe, "Día do Ensino" e lendo as entradas no noso blogroll (meu deus que xeito de pasar e pasar artigos… algúns deles nin os vemos!!) atopo dúas, para min, fantásticas. Son a de Bibliocaxado e a de Castro de Baroncelli.

As dúas falan de libros, de lectura e… unha delas, ademáis, de Ferrol...

Bibliocaxado enlaza co artigo de Manuel Rivas que aparece hoxe no Pais “Os barcos, o leite e os libros”
“Unha das cousas que máis se parece a un libro é un barco. E iso foi o que fun contar a Ferrolterra, o mellor porto natural do Atlántico, o grande obradoiro do mar, alí onde se formou, laboriosamente, a estirpe dos mellores construtores de naves. E non lle deixan facer naves! Máis que xeopolítico, o de Galicia éche un caso de sadomasoquismo histórico. Sabemos facer barcos, hai demanda, mais non nos deixan. Temos un millón de vacas, aumenta a demanda e o prezo do leite para o consumidor, mais as familias gandeiras van á ruína. Temos unha lingua, e unha industria cultural que leveda, e aínda hai xente que dedica a vida a escornar contra dela, como os calamitosos que aínda andan a botar dinamita no mar.”

Castro de Baroncelli acércarnos á figura e á obra de Ruvem Alves e a un dos seus artigos "O prazer da leitura"
“Se os jovens não gostam de ler, a culpa não é deles. Foram forçados a aprender tantas coisas sobre os textos - gramática, usos da partícula “se“, dígrafos, encontros consonantais, análise sintática –que não houve tempo para serem iniciados na única coisa que importa: a beleza musical do texto literário: foi-lhes ensinada a anatomia morta do texto e não a sua erótica viva. Ler é fazer amor com as palavras. E essa transa literária se inicia antes que as crianças saibam os nomes das letras. Sem saber ler elas já são sensíveis à beleza. E a missão do professor? Mestre do kama-sutra da leitura...”

Entrevista a Ruvem Alves onde fala da súa idea do ensino e do papel do profesor.
Non a perdades!!

Que mellor no "Día do Ensino" que ler e falar sobre a nosa lingua, literatura, ensino, mestres...?

Un Ano Formando Parte desta Tolemia Colectiva!!!

O noso blogue ven de cumplir o seu primeiro ano, un ano xa formando parte desta tolemia colectiva, de feito xa o celebramos, pero non queremos deixar pasar a oportunidade de amosarvos todo o que temos organizado arredor del.

Cando saímos ao ciberespazo, os principais obxectivos que nos marcamos foron o fomento da lectura e a escritura así como o achegamento das TICs ao noso alumnado. Así mesmo pretendíamos ser unha fiestra cara ao exterior a través da que poidéramos non só poñer a disposición dos nosos visitantes todo o material de dinamización elaborado na nosa biblioteca senón tamén aprender das marabillosas experiencias e traballos expallados pola blogosfera.

O primeiro que fixemos foi organizar unha páxina estática:

“O Noso Faiado”: O almacén onde gardamos todos os nosos materiais.

Logo, e cara a conseguir todos os obxectivos marcados, pensamos en crear distintos blogues coa intención de motivar ao noso alumnado na súa experiencia lectora e escritora:

“O Club de Lectura do Segrel”: Un blogue onde os seus membros poden deixar os seus comentarios sobre as lecturas seleccionadas.

"O Blog dos Segreis”: Tenta ser un verdadeiro punto de encontro para o noso alumnado no que poder facer os seus comentarios, as súas suxestións de lectura, cine, música...

"O Segrel Cinema": Nace coa intención de acercarmonos ao cine e aos fondos que ai na nosa biblioteca.

“Radio Barullo”: Un blogue que saiu á blogosfera o día do noso primeiro aniversario e que quere ser a porta á través da que saía ao exterior a nosa radio escolar e o fantástico traballo que dende ela comeza a facer o noso alumnado.

E por último, que non menos importante...

“O Noso Álbum Fotográfico”: Onde se recollen todas as reportaxes gráficas das distintas actividades realizadas ao longo do curso.

A nosa idea primordial é facer do noso blogue un punto de encontro onde aprender, debater, colaborar, e sobre todo compartir. E como podedes comprobar está comezando a dar os seus froitos.

E para completar este ano fantástico que mellor que amosar o noso traballo presentando "O Segrel do Penedo" ao II Premio Espiral Edublog 08

Grazas a todos e todas os que estades aí e facedes desta andaina unha viaxe chea de emocións e de novas experiencias, unha andaina na que os amigos sodes imprescindibles.

As Nosas Mochilas Viaxeiras

As nosas mochilas viaxeiras están xa a piques de emprender a súa terceira viaxe ás casas dos nosos rapaces e rapazas de 1º de ESO e a segunda ás de 2º.

Unha experiencia que está a resultar moi positiva e da que todos estamos aprendendo moito. De feito, xa estamos pensando en facer algunhas modificacións tendo en conta as suxestións destes, nalgúns casos, nosos novos usuarios.

Algunhas opinións sobre a iniciativa:

• Actividade motivadora xa dende o primeiro momento, ver que trae a mochila e repartirnos a lectura.
• Foi unha actividade positiva xa que os membros da familia poidemos compartir o material que ven nela.
• A idea paréceme moi orixinal e percíbese o intento serio de fomentar a lectura dun xeito serio e lúdico.

Algunhas das suxestións:

• Incluir algunha páxina web interesante á que podamos acceder cos fillos/as.
• Incluir títulos de literatura clásica.
• Incluir música para escoitar lendo, tipo New Age ou Chillout.

Celebración do Día do Libro!!

No Día do Libro tivemos a oportunidade de ver, tocar, admirar e ler libros de literatura fantástica e de misterio, de escoitar a algúns rapaces e rapazas lendo e falando dos seus libros favoritos. Tolkien, Roal Dahl, Fran Alonso, Bosman, Benedetti… estiveron connosco.

Dende Radio Barullo escoitamos fermosos poemas e soubemos dos soños e ilusións de Samantha, unha alumna de 2º de bacharelato, que nos deleitou cun Rap escrito por ela “Esta es mi vida”

No Día do Libro falamos de libros, de lectura, de música... de algunhas das nosas paixóns.

Presentación de "Radio Barullo"

Hoxe, neste día tan especial para nós, queremos facer a presentación oficial do Blogue da nosa Radio Escolar "Radio Barullo".

Unha presentación que podedes escoitar na voz de Sara Jove, alumna de 1º de ESO.

Neste blogue recolleranse as distintas actividades que organice o noso alumnado.

E comezamos cunha serie de entrevistas a algunhas das "Xoves promesas" do noso instituto. Rapaces e rapazas aos que lles gusta a música, a literatura, o cine... e que cada semana, Roberto, alumno de 3º de ESO, e un fan das ondas, irá presentando.

Non deixedes de escoitar a Samantha, ten unha voz preciosa.

Parabéns rapaces, isto promete!!

Día Internacional do Libro

En 1995 a UNESCO declarou oficialmente o 23 de abril como o Día Internacional do Libro.

Un 23 de abril, do ano 1616, morreron Cervantes e Shakespeare. En España celébrase esa data coa entrega do Premio Cervantes, o Nobel da literatura en lingua castelá, que este ano recaeu na figura do escritor arxentino Juan Gelman

Cartel obra de María Reboredo do IES Río Cabe (Monforte)

Dende a Biblioteca de "O Segrel do Penedo" imos celebrar esta data con distintas actividades:

Exposición de Libros de Literatura Fantástica e de Misterio

"Os libros ábrenche a porta a un mundo de

Ilusión, Fantasía, Misterio...

Entra e compróbao""

Proxección do corto de Pablo Bullejos "La Segunda Estrella a la Derecha"

Maratón de lectura

Plantación de unha árbores polo alumnado de 1º de ESO, quen se encargará do seu coidado e mantemento.

Como consumidores de libros queremos aportar o noso graíño de area á construcción dun planeta máis verde.

FELIZ DÍA DO LIBRO!!

Cumprimos 1 Ano!!

Pois xa vedes, saímos nas noticias, e non é para menos...

Hoxe, Día do Libro, fai un ano que "O Segrel do Penedo" saíu ao ciberespazo.

Un ano que non tería sido posible sen os AMIGOS que sempre estades ahí.

Grazas...

Ás MANS que nos levan pola blogosfera.

Ao AMIGO que comparte esta andaina.

Aos PLAMBEIROS e demais Blogueiros que nos enlazan, nos visitan, nos apoian, nos animan e sempre nos aprenden.

Que sexan moitos máis en tan boa compañía!!

22 de Abril: Día da Terra

Hoxe celébrase en todo o mundo O Día da Terra.

Ata cando non imos tomar conciencia do que estamos a facer?

Algunhas das causas do cambio climático estamos a sufrilas en Galicia nestes últimos días, as fortes precipitacións coas conseguintes inundacións así como os fortísimos ventos.

Serverá isto para modificar algunha das nosas actitudes?

Máis información en:
Wikipedia
National Geoghaphic
Ecologistas en Acción
Educación en Valores
Algunhas Ferramentas Didácticas

O Cartel é obra da María Reboredo do IES Río Cabe (Monforte)

O fabuloso Karlo Cercedini

Mentres pensábamos como celebrar o primeiro aniversario do blog, descubrimos que non tiñamos libros de ilusionismo!!!! Un detalle imperdoable en tempos de Harry Potter e, máis aínda, vivindo na ría que veu nacer a Lorc. Á espera de adquirir algún exemplar, puxémonos en contacto cuns magos para ver se podían darnos unha actuación.
Grazas a eles, hoxe presentamos a un artista que ten traballado nos cinco continentes. Por primeira vez en España e por primeira vez nun blog das bibliotecas escolares!!!!!! O fabuloso Karlo Cercedini, o gran mago da Wii!!!!!

Dádelle ao play que este tío non traballa sen música. Rápido!!!!!





“Buon giorno, buona notte a tutti. Me chiamo Karlo Cercedini. Io sono il primo mago de la Wii. Io voglio salutare a Loly e a tutti os seus amicis das biblios. Neste momento, io tengo na mano il mando de mi Wii e io podo cortocircuitar il vostro cerebro. Pulso un botón dil mando e il vostro cerebro non funciona correctamente. OK? Preparados?

1º Tu respirare profondamente.....Bene

2º Levanta el pie dereito e fa círculos en el aire en el senzo de las agullas del reloj, hacia la derecha.....Bene. Non parare.

3º Io toco un botón del mio mando de la Wii….Bene.

4º Alora, sen deixiar de facer iso, traza un número 6 en el aire con la túa mano derecha…. Que cuosa pasa con el pie? Incredibelmente , il vostro cerebro está desconfigurato!!!!

Un aplauso forte per me.

Grazie, bellisimo público spagnolo. Per voi moitos pop corn. Grazie. ”

La Segunda Estrella a la Derecha

No mes dos libros, para algúns de nós, non xa todos os meses senón todos os días deberían ser dos libros, da lectura…

Dicía Borges “Hai quen non pode imaxinar un mundo sen paxaros; hai quen non pode imaxinar un mundo sen auga; no que a min se refire, son incapaz de imaxinar un mundo sen libros.”

Presentamosvos un corto do director Pablo Bullejos que chegou ata nós a través da lista de correos de BESCOLAR.

Un marabilloso corto sobre a animación á lectura nas bibliotecas, cuxo título xa di moito...

"LA SEGUNDA ESTRELLA A LA DERECHA"

Que o disfrutedes!!

Roteiro polas Bibliotecas Escolares (IV)

E chegou a data sinalada, Mércores 12 de Marzo. Levábamos moito tempo esperando esta visita. Marina tiña moitas ganas de que fóramos, pero penso que nós aínda tíñamos máis.

Quedamos ás 14.30 na praza do pobo, pero os GBI, ansiosos como estabamos por chegar, tivemos tempo ata de probar uns pinchos de tortilla boísimos.

Marina chegou á hora fixada, e despois dos bicos e abrazos (esta muller faise querer e de que xeito!!) fumos comer. A comida e a conversa tan agradable fixeron que o tempo pasara boando. Rematamos cun café de pota magnífico e saímos para o cole.

No IES de Arzúa a biblioteca escolar está moi presente. Nada máis entrar, os carteis que nos dirixen a ela enchen as paredes. No noso camiño cara á biblioteca pasamos diante da Sala de Profesorado onde fixemos a nosa primeira parada. Ali coñecimos a Catalina unha das principais protagonistas da dinamización desta biblioteca. Casualmente estaba sentada nun dos puntos de lectura que hai espallados polo instituto. (Xa vos contamos que a biblioteca faise ver por todo o centro!!) Este é moi especial, e a decir polas artífices de tal marabilla, ademais de ser moi frecuentado polos profes, os libros que alí expoñen son moi solicitados por este grupo de usuarios. (Xa tomamos boa nota e pensamos poñelo en práctica, será unha das nosas novidades do vindeiro curso!!). Tamén coñecimos a Oki. Cantas gañas tiñamos de poñer cara a esta fenomenal blogueira!!

E continuamos o noso camiño.

Vaia entrada máis espectacular ten esta biblioteca!! Á súa porta atopamos unha zona de informática e diferentes exposicións coas novidades e suxestións de lectura, cine e música. Realmente se respira o aire da biblioteca por todas partes.

Entramos na Biblioteca e Marina ensinounos todos e cada un dos seus recunchos e detalles. A zona de rexistro e a de informática, fantásticas, o libro do mes, nesta ocasión é Persépolis, un dos cómics de culto, a caixa das suxestións, a zona da audiovisuais e a Sala Mondrián da que xa nos fixera chegar varias fotos a través de BiblioArzúa. Pero aquí non acaba todo, esta biblioteca tamén ten un pequeno almacén e incluso un baño. Vamos, que non lle falta detalle algún. Unha biblioteca onde a cor é unha das súas características predominantes, pero sobre todo o que máis se respira alí é a paixón que estas tres mulleres poñen no traballo que fan.

Parabéns Marina polo bo facer e por conseguir da vosa biblioteca escolar, esa biblioteca que ti sintes como algo teu, un verdadeiro punto de encontro!!!

E chegou a hora de írmonos, pero non sen antes asinar no seu Libro de Ouro. Meu Deus, que honor!!

Máis non nos podíamos marchar de Arzúa sen admirar a outra paixón da nosa anfitriona. As súas plantas e xardíns. Realmente preciosos!

Marina, foi un verdadeiro placer compartir este día contigo. Ata sempre e por sempre!!!

*Se queredes ler os pés das fotos, só tedes que picar no "bocadillo" do lateral inferior esquerdo.

Outros Roteiros

CEIP Milladoiro-Malpica

CEIP José Cornide (A Coruña)

IES Uxio Novoneyra (A Coruña)

Tamén nos outros GBI Blogues

A Nosa Biblioteca

Biblioafonso

11ª Olimpíada do Saber!!

Toda a información en O Noso Faiado a partir do luns

Pero se aínda así vos queda algunha dúbida, xa sabedes, ide á Biblioteca e falade con Inma ou Begoña (Non llo digades a ninguén, pero elas teñen todas as respostas, esas mulleres sábeno todo!!)